SAMIM E LATOLA MAFOSISA MOZAMBIQUE
La 31 Phupu 2023
Bolaoli ba sesole sa SADC Mozambique (SADC Mission in Mozambique – SAMIM) bo re bo tšoenyehile ke mafosisa a hlahileng koranteng ea Mozambique. Ho ea ka polelo ea SAMIM, koranta ea Carta De Mozambique e ngotse mafosisa tlas’a sehlooho sena: “Sesole sa Afrika Boroa se thunya motho ha se qeta se a mo furalla Macomia.”
“Litaba tseo li jere tšenyo ea lebitso ka maikemisetso feela ho hulanya seretseng lebitso la sesole sa naha e amehang.” Ho rialo polelo. SAMIM e re ka mafosisa ao, koranta e boetse e silafatsa seriti se setle sa sesole sa SADC.
“Ho feta mona, litaba tseo li tsoela-pele ho tsoa tlaase litšiea tse nepahetseng tsa boqolotsi ba litaba le boitšoaro bo lebelletsoeng kaha sesole seo ho buuoang ka sona se ne se le sieo mono ka nako eo ho thoeng ketsahalo e etsahetse ka eona.” Polelo e baleha joalo.
Phatlalatso e tsoela-pele ho bontša ngongoreho le ho khothaletsa litsi tsa bophatlalatsi ho tsoela-pele ho hasa litaba li latetse methati e nepahetseng ea boqolotsi.
“Litsi tsa bophatlalatsi li lokela ho tlaleha litaba ka boiphihlelo bo holimo-limo ha li tlaleha liketsahalo malebana le SAMIM.” Raliphatlalatso oa SAMIM ea tekenetseng phatlalatso, Major M.K Letshwiti o re phatlalatso ea litaba ka ntoa ena e bohlokoa katlehisong ea matšolo a sesole sa SADC Mozambique le hloahloeng e ka Afrika e ka Boroa ka moka.
“SAMIM e tsoela-pele ho sebetsa le mafapha ‘ohle a nang le kobo ea bohali ho bona hore bophelo ba batho ba neng ba phaphathehile Cabo Delgado bo khutlela setloaeling. Sesole sa SADC se lakatsa ho netefaletsa sechaba sa Mozambique le lichaba tsa SADC ka kakaretso ka morero o kopanetsoeng ho tlisa khotso, botsitso le ho sireletsa Cabo Delgado ho ea ka tumellano ea naha ea Mozambique le SADC.
SAMIM e na le boiphihlelo ‘me e ke ke ea iphapanyetsa boitšoaro bo bobe bo ka etsoang ke masole a eona. Moo ho bang le ho tlola moeli oa tšebetso bolaoli ba SAMIM bo nka likhato ho sebetsa taba e joalo.” Major Letshwiti o phethela joalo polelong e ngotsoeng ka la 25 Phupu 2023.
