RE NTSE RE LE LITHO TSA RFP – BO-PHAMOTSE
Ka ‘Matlhohonolofatso Lebesa
La 12 Mphalane 2023
Maparamente a mararo a mathuleng a ho lelekoa mokheng oa Letšolo la Thala-Boliba ea Moruo (Revolution for Prosperity – RFP) a fane ka ntlha-kemo ea ‘ona khahlanong le mohopolo oa ho a leleka maobane ‘mokeng oa baqolotsi ba litaba liofising tsa Transformation Resource Centre, Maseru. Bakhethoa bao ke Dr. Mahali Phamotse oa lebatooa la Matlakeng, benghali Thuso Makhalanyane, oa Abia le Rethabile Letlailana oa Lithoteng.
Maparamente ana a ile a behelloa ka thoko ho mokha oo nako ea lilemo tse tšeletseng ka Phato kamora hore komiti ea khalemo e a fumane a le molato oa ho roba melaoana le litšiea tsa RFP joaloka ho vouta le bohanyetsi ka paramenteng. Liqoso tsa bona li fumaneha litabeng mona ka botlalo.
Ntle le kahlolo ea ho ba behella ka thoko ho mokha lilemo tse tšeletseng, ho boetse ho na le khothaletso ea teleko ea bona ho ea ka qeto ea tulo ea seboka sa RFP ea la 30 Phato 2023 hore ba jarisoe thoto ka monkhoane bophelo bohle.
Ha a khotha seotlo ho tšetleha lehlakore la bona, Phamotse o totobalitse hore bona e ntse e le litho tsa RFP leha komiti e kholo e na le morero oa ho ba lelekella ruri.
Phamotse oa nama: “Re fumane mangolo a bontšang ha seboka sa la 30 Phato 2023 se entse qeto kapa khothaletso ea hore re lelekoe. Toko-toko re bone komiti e kholo e re ngolla mangolo e re re teke mabaka ao ka ’ona komiti e kholo e ke keng ea kenya qeto ena ea seboka tšebetsong.” Phamotse oa hlalosa, a bile a supa hore ba arabile mangolo ao ho bontša hore ba ntse ba laoleha kahara mokha oa bona.
Dr. Mahali Phamotse
“Ke rata hore sechaba se elelloe hore re ntse re le litho tsa Letšolo, kaha ke hona re leng lipuisanong tsa ngollano le lona Taba e ‘ngoe ke hore re ntse re le litho tsa paramente tsa Letšolo tse hlahletseng nyeoe khahlonong le pehello ka thoko ea rona e baletsoeng lilemo tse tšeletseng ho thoe re se ikamahanye le letho la Letšolo.” Phamotse oa li beha.
O lomahantse meno hore ha ba lumellane le liqeto tse etsoang kahara RFP kaha maano a Letšolo a tšepisitse Basotho liphetoho. O fane ka mohlala hore ba ile ba bontša khanyetso tsamaisong ea RFP ka paramenteng ka ho khetha khahlanong le ‘muso.
O tehile ka mehlala e ‘maloa ea litšepiso tsa RFP hore matona a tla palama likoloi tsa malapa a ‘ona ekasitana le ho lula malapeng a ‘ona empa a re taba eo ha e ea etsahala:
“Ho se ho bile ho na le morero oa ho khutlela sechabeng ho ea se hlalosetsa haeba liqholotso li le teng. Ebile ho nyolotsoe litjeo ofising ea tona-kholo kaha mohlomphehi tona-kholo o sebelisa makoloi a hae a boleng bo holimo a bileng a lokisoang le litšebeletso tsohle ka litjeo tse boimahali.”
O hlalositse hore har’a litšepiso tsa RFP pele ho likhetho e bile ho felisa chelete ea maparamente ea mafura e kaalo ka M5000. A re taba ena le eona ha e ea etsahala. O supa hore ha ho mabaka a tekeloang sechaba hore na chelete eo ha e ea felisoa hobaneng ho latela tšepiso.
A re tšepiso e ‘ngoe e bile hore ho se hiroe ka seueso-ueso. O ile a toboketsa hape hore ba soabile kaha hang hoba RFP e kene pusong, e ile ea qalella ho hira ka sepolotiki liofisiri tse kholo tsa ‘muso ho se ponaletso. O boetse a tlaleha hore ngoetsi ea tona-kholo e ile ea fuoa mosebetsi oa ho okamela Koporasi ea Lesotho Housing hammoho le baamani ba bang ba matona ba ileng ba fuoa mesebetsi. A re lintho li ngata tseo RFP e iketileng ka tsona empa e hlotsoe ho li phetha.
“Re bona maparamente a RFP a qobelloa ho voutela lintho tse ling ka paramenteng a tlola molao. Re ile ra qobelloa ho voutela hore paramente e tšohle litaba tse ka makhotleng, ntho eo ke tlolo ea molao.” Ke eena a supa hore lekhotla le ile la ahlola la re RFP e tlotse molao.
Ho sa le joalo, mokhethoa oa Matlakeng o boetse a supa hore leha ho na le tse ngata hakaalo tse mpe tsa puso empa ‘muso o boetse o ntse o etsa lintho tse ntle moo a qollotseng ho kenngoa hoa mabone a maholo litseleng tsa toropo ea Maseru le tokiso ea litsela.
Ka lehlakoreng le leng ha a thatiselletsa litabeng tsena, mohlomphehi Makhalanyane o rapalalitse hore ke ka makhetlo eena a bontša nyatso ka tsela eo RFP e tšoarang litaba ka teng hoo moetapele oa RFP a ileng a mo bitsetsa lekunutung. A re khang ea hae ebile ha bakhethoa ba ikaba ka mesebetsi le ho abela litho tsa malapa a ‘ona mesebetsi empa sechaba se ba file monyetla oa ho sebetsa paramenteng.
Thuso Makhalanyane, mokhethoa oa Abia
Makhalanyane o lihetse likhala ka hore ha paramente e buloa ka Labohlano, ba tlo tsoela-pele ho lula lehlakoreng la ‘muso kaha sechaba se ba khethetse ho busa. O itse ebang ho ka ba le ba sa khotsofalleng ho lula le bona, ba amohelehile ho tloha.
