ECONET E BEBOFATSA KAMOHELO EA CHELETE HO TSOA KANTLE HO NAHA
Ka Moipone Makhemeng
La 11 Mphalane 2023
K’hamphani ea mehala, Econet Telecom Lesotho, ka lekalana la eona la Sasai Econet Financial Services, e tlabotse selekane le Sasai Money Transfer, e leng e ‘ngoe ea litsi tse kholo tsa phetiso ea chelete ka marang-rang Afrika. Sasai Money Transfer ke lefapha la k’hamphani ea Cassava Technologies.
Selekane se tlil’o thusa basebelisi ba EcoCash ho romelloa chelete ho tsoa linaheng tse ‘maloa tsa lefatše.
Moifo oa Econet Telecom Lesotho le litho tse ling ‘mokeng oa baqolotsi
Taba tse monate tsena li hlahelletse ‘mokeng oa baqolotsi o bileng hoteleng ea Lancer’s Inn Maseru maobane.
Tšebelisano ena e tlil’o lumella le ho matlafatsa mokhoa oa thomello ea chelete ho Basotho ba likete-kete ka mokhoa o sireletsehileng ho hlaha kantle ho naha. Sethala sena se tlo lumella baamani le metsoalle ho amohela chelete ho tsoa linaheng tse latelang; Afrika Boroa, UK, China, Pakistan, India, Zimbabwe Zambia, Botswana, Kenya, Uganda, Tanzania, Congo, Ghana, Somalia le Malawi.
Ho feta moo, ho ea ka tlhaloso ea mookameli oa Sasai Money Transfer mofumahali Lee Ann Lancaster, selekane se tlil’o thusa hape basebelisi ba EcoCash ho fumana chelete ka tsela e potlakileng, e bonolo hape e sireletsehileng. Lancaster o bontšitse hape hore chelete e tla fihla hang-hang ha e romeloa ka litjeo tse tlaase tse amohelehang, a hlalosa hore litjeo li tla tloha ka 15%.
Lee Ann Lacaster, Mookameli oa Sasai Money Transfer
Ho sa le joalo, Mookameli oa Sasai Financial Services mofumahali ‘Matikoe Letsie o ile a phatlalatsa hore ba boetse ba thakhola Ecocash App. Letsie o tobokelitse hore Ecocash App ke sehlahisoa se tlo lumella Basotho ho romela chelete.
A supa hape hore basebelisi ba Ecocash App ba tla tseba ho romela chelete hohle moo ba leng teng. O hlalositse hore ho boetse ho na le Society App; sena o boletse e le sehlahisoa sa baikopanyi mekhatlong ‘me eona e tlo lumella setho se seng le se seng sa mokhatlo ho bona le ho laola tlatsetso ea sona kahara mokhatlo.
‘Matikoe Letsie, Mookameli oa Sasai Econet Financial Services
“Hape ntho e thabisang ka tšebelisano-‘moho ena ke hore e fana ka tharollo e hlokahalang haholo ho eketsa phihlello le litefiso tse amohelehang ho malapa bakeng sa kholo ea lichelete le menyetla ea matsete.” Ho rialo mofumahali Letsie.
Ho sa le joalo, Mongoli e Moholo ea Ikhethang ofising ea Tona-Kholo, mofumahali Moleboheng Mokobocho o bontšitse a le motlotlo haholo hore ebe tlhoko ea nako e telele ea Basotho ba phelang ka ntle ho naha e arabelehile kajeno mabapi le ho romelloa chelete ho tsoa kantle ho naha.
Moleboheng Mokobocho, Mongoli e Moholo ea Ikhethang ofising ea Tona-Kholo
Mokobocho o itse ofisi ea habo e ntse e potoloha le linaha ka ho fapana ho utloa liqholotso tseo Basotho ba thulanang le tsona naheng ka ‘ngoe. O re sello se seholo e bile mokhoa oa ho romela beng ka bona chelete hae.
“Mosebetsi oa rona e ne e le ho khutlela hae ho fumana tharollo le ho kopana le ba amehang e le ho fumana se ka etsoang. Ba amehang tabeng ena e ne e le Vodacom Lesotho le Econet Telecom Lesotho. Ke thabetse taba ea hore ha re kopana le Econet ba ne ba se ba hatetse-pele tabeng ea ho leka ho fihlela tlhokahalo eo. Re hlahisitse se tšoanang ho Vodacom hape hobane e batla e le linaheng tsohle.” O li beha joalo.
Ha a phethela puo ea hae, Mokobocho o ipilelitse hore sehlahisoa sena se lokela ho tla ka litjeo tse bobebe kaha joale ha litjeo li ka ba holimo hoo ho tla imela sechaba.
Ha a thatiselletsa litabeng tse tekiloeng, Mookameli oa Phethahatso Econet Telkom Lesotho, Dennis Plaatjies eena o hlalositse a lebohile hore ebe ba boetse ba tlisa selekane se seng litšebeletsong tsa bona ho tla thusa Basotho. A bontša Basotho ba bangata ba tlo una molemo selekaneng sena.
O kobelletse litaba ka hore hajoale ha ho sa hlokahala hore baamani ba phelang Afrika Boroa ba ka ingoaea lihlooho ha ba lokela ho romela chelete hae kaha Econet e ba bebofalelitse.
“Taba e monate haholo ka Sasai Money Transfer ke hore mokhoa ona oa thomello ea chelete ha se oa mehleng ea khale haholo leha re ntse re fetohela ho tsa morao-rao ka mokhoa oa marang-rang. Re ka khona ho fana ka litšebeletso tsa phetiso ea chelete ka mehala le likomporo tsa rona.” O fera joalo Plaatjies.
Dennis Platjee, Mookameli oa Phethahatso Econet
