RANTAOANA O TLA TORONKA LEMO TSE 31 KA HO BOLAEA LESOLE
Ka moqolotsi oa rona
La 3 Motšeanong 2023
Moqosuoa Motlatsi Rantaoana, ea fumanoeng a le molato oa ho thunya le ho bolaea lesole la Lesotho, Private Katleho Seliane, ekasitana le teko ea polao moo a ileng a thunya le ho khobatsa Private Halekhethe Nkonyana borokhong ba Maseru ka la 13 Motšeanong 2017 o ahlotsoe kajeno.
Moahloli ‘Mafelile Ralebese o itse lekhotla le lokela ho fana ka kahlolo le ipapisitse le thahasello ea sechaba nyeoeng ena. A re lekhotla le etse hloko hore moqosuoa e ne e le motho oa lihlopha tsa ‘mino oa Famo, tseo ka boma-limabe li mo susumelitseng ho etsa litlolo tsena tsa molao tse mo behileng kapele ho lekhotla.
A re ka lebaka la ho phela bophelo boo ba lintoa ka lebaka la maquloana a Famo, moqosuoa o bile a kalima sethunya ka sepheo sa ho thunya mang kapa mang oa lihlopha tsa lireng.
“Ke mona moo a ileng a belaella masole a neng a sa apara junifomo eaba oa a thunya, a bolaea Private Seliane le ho lematsa Private Nkonyana.”
“Lekhotla lea hlokomela hore lipolao tsa batho ba Famo li itšemme kahona kotlo e lokela ho etsa hore lipolao tsena li emise e seng joalo, ho tla ba le ntoa ea bana ba thari naheng ena.” Ho rialo moahloli.
Ralebese o ile a re moqosuoa o amohile Private Seliane bophelo a sa le monyane kaha a ne a le lilemo li 23 feela, ‘me a mo amoha baphelisuoa le lelapa la hae.
A re leha Private Nkonyana a ile a phonyoha lefu, a khobala feela, a re bonnete moqosuoa o na le morerong oa ho ‘molaea le eena. A re oa ipotsa hore na Private Nkonyana h’a hopola ketsahalo ena pelong ea hae ho ba joang.
A re lekhotla le utloile boitelo ba moqosuoa hore o kene lihlopha tsa Famo a hoheloa ke chelete empa hajoale ha ho seo a ka se etsang holatela maemo ao a ikentseng kahara sona.
Moahloli ha a phethela o itse moqosuoa ke lekhetlo la pele a tlola molao, a re leha a lutse ho feta lilemo tse hlano chankaneng, e ne e le ka boikhethelo ba hae kaha a ne a bontše hore o tlo phela ka letsoalo la ho bolaoa nako efe kapa efe ka sethunya haeba a sa lule chankaneng.
“Qosong ea bobeli ea polao ea Private Seliane kahlolo ke lilemo tse 20. Qosong ea boraro ea teko ea polao ea Private Nkonyana, u tla hoehla lilemo tse leshome (10) athe qosong ea ho ba le sethunya ka thoko ho molao o tla hoehla selemo se le seng. Likahlolo tsena li tla tsamaea li arohane.” Moahloli Ralebese o lihile kahlolo joalo.
