PHALA EA LEPOSA E KHUTLELA LESOTHO
Ka Moipone Makhemeng
La 14 Tlhakubele 2024
Motlatsi Mofokeng, phala ea mokhatlo oa mapolesa (Lesotho Police Staff Association – LEPOSA) o khutletse ka hare ho naha ea Lesotho kajeno kamora ho phaphatheha a baleha ho ts’oaroa ke mookameli oa mehleng oa sepolesa, Holomo Molibeli. Molibeli o ile a leleka Mofokeng mosebetsing oa sepolesa a re o hiruoe ka phoso a mo qosa ka hore o na le tlolo ea molao eo a ileng a etsa – ea ho loana le moshanyana e mong ha ba sa kena sekolo se phahameng.
Motlatsi Mofokeng o amohetsoe ho tsoa palehong
Kajeno litho tsa LEPOSA li ile tsa ts’oara ‘moka oa bo-ralitaba liofising tsa mokhatlo, TEBA, Maseru. Mongoli-Kakaretso oa Mokhatlo, ’Makatleho Mphetho o hlalositse sepheo e le ho amohela setho sa bona se ileng sa baleha ka la 18 Tlhakubele 2024, e leng lilemo tse peli tse setseng hanyane li phethela boraro a le palehong.
Molula-Setulo oa mokhatlo, monghali Lalane Maloi ha a amohela Mofokeng o supile hore mokhatlo oa LEPOSA o lumela hore Mofokeng ke karolo ea Lesotho Mounted Police Service (LMPS) kaha ebile e ntse e le setho sa mokhatlo.
Ka lehlakoreng le leng, None Mohapi ho hlaha Tikolohong e Bohareng, o ile a beha mantsoe a latelang ho amohela Mofokeng; “Monna heso u ile oa tsamaea matsohong a ka ke ntse ke ts’oere molepo ke le motlatsi oa molula-setulo. Tsatsing lena u khutla ke se ke li hula nthau. Ke motlotlo hore u ile oa tsamaea oa ba oa khutla ke ntse ke le teng. Ke sebelelitse ho pholosa bophelo ba hau. Le hore ke bone hore ha u se u khutla tjena u teng u ntse u phela. Leha nka ka itokolla oa ka mosebetsi ke o entse.”
None Mohapi oa Tikoloho ea Bohareng
Mohapi a bonts’a hore bosieong ba Mofokeng matla a bona a ne a tutlehile empa hajoale ho khutleng hoa hae matla a bona a boetse a khutlile. A mo kopa ho kena ka matla a ts’oanang le ao ba a tsebang ‘me a re a se khutle e le lekoala.
Ho sa le joalo, Mofokeng ha a lahlela mantsoe a hae o ile a bolella baphatlalatsi hore moo a neng a phela teng o ne a phela ka ts’ehetso ea litho tsa Leposa ka koleke ea M30 ea botho.
“Ke khethile ho qala ka LEPOSA hobane eona ke mosala-le-likhutsana. Ha u mpona ke ntse ke phela tjena, ke ne ntse ke phela ka M30 tsa litho tsa heso. Ha u mpona ke le lekukanyana tjena ke ne ke iphelela feela ka M30 tsa litho tsa LEPOSA.” O hlalosa joalo.
Teboho Modia, Mopresitente oa LEPOSA
O ile a toboketsa hore motho e mong le e mong o phela leeto la hae. A re ha a le palehong ho shoele batsoali le likhaitseli tsa hae tseo kajeno a seng a tla fihla mabitleng a bona feela ho beha majoe.
Ho feta mona, o lebohile mookameli oa sepolesa oa mehleng a nt’o leboha ea ts’oereng molepo hajoale – Dr. Mohlape Morai. O bile a boela a supa hore ke ka lebaka la mookameli e mocha oa sepolesa, Dr. Morai a khutletseng ka hare ho naha kaha Sesotho se re ‘m’e o ts’oara thipa ka bohaleng.
Qetellong mopresitente oa mokhatlo, monghali Teboho Modia o teketse baphatlalatsi hore o motlotlo ka boteng ba Mofokeng ka hare ho naha. A supa hore ha oa ba monate ho bona ha a tloha ka hare ho naha.
Molula-Setulo oa mokhatlo, monghali Lalane Maloi
“Ntate, your vocality ke ntho eo litho tsa LEPOSA li e ratang. Motho ha a tsoetsoe le bokheleke o tsoetse le bona ‘me ha ho na seo u ka se etsang.
Molimo o u file sona. Hoa rona ke ho u aha le ho u ts’ehetsa. ‘Me LEPOSA mona ehlile re aha baeta-pele.” Modia o li beha joalo kapele ho Mofokeng.
O ile a eketsa ka ho kopa ts’oarelo ho eena hore ke ka lebaka la ho mo khetha hoa bona ho re e-be phala ea mokhatlo a fetileng har’a mathata.
‘Makatleho Mphetho – Mongoli-Kakaretso oa LEPOSA
Ka ho khetholoha o ile a supa hore ha batho ba bang ba bala likatleho tsa bona, eena o bala mabitla. Litho tsa LEPOSA li itse li lumela hore Mofokeng e ntse e le lepolesa kaha ba lumela e sa nepahala. Ba thatisellelitse hape hore ba ile ba kenya nyeoe lekhotleng le phahameng ‘me ba lumela hore hajoale boteng ba Mofokeng, nyeoe e tla tsoela-pele neng kapa neng.
Sena se hlalositsoe ke Mphetho ha a arabela baphatlalatsi mabapi le mokholo oa hae kaha monghali Mofokeng a boletse hore o phela ka M30 tsa litho tsa LEPOSA.
