PEOPLE’S MATRIX E TŠOELA KA MATHE LIKHOBOSO TSA LENYALO LA LIKHABISO
La 19 Loetse 2023
Mokhatlo o sireletsang litokelo tsa batho ba bong bo le bong, The People’s Matrix Association o lokollotse polelo e bohale ho tšoela ka sehlethela sa mathe lipuo tsa likhoboso le linyeliso tse hlahelletseng ho marangrang. Lipuo tsena li entsoe khahlanong le lenyalo la molao la morali oa moparamente Dr. Mahali Phamotse, Likhabiso Phamotse le molekane oa hae Kgomotso Monare ba ileng ba tiisa lenyalo Johannesburg ka la 9 Loetse 2023.
Polelo e baleha tjena: “Maikutlo ana a likhoboso a kotsi kaha a baka khethollo hammoho le lehloeo ho batho ba LGBTQ+ ekasitana le ba sebetsang le bona. Leha maikutlo a batho a bonahetseng ho marangrang a shebahala a se kotsi hoba ke ntho tsa marangrang, empa litla-morao tsa maikutlo ao li ka tšoareha ebile li ka baka ntoa le ho shoa hoa batho.
“Molao oa motheo oa Lesotho o lumella tšireletso ea litokelo tsa mantlha tsa botho hammoho le bolokolohi ho bohle. Temana ea bone ea molao oa motheo e fana ka tšireletso litšieeng tse latelang; tokelo ea bophelo bo ikhutsitseng ba motho ka bomong hammoho le lelapa, tokelo ea ho ntša maikutlo, ho kena mokhatlo oa khetho ea hau hammoho le tokelo ea ho se khetholloe.
“E le ho bona hore sechaba sa Basotho se phela ka ho amohelana, Moahloli e Moholo (Sakoane Sakoane) o sa tsoa phatlalatsa haufi hore ho lokela ho etsoe maano a tla tlisa kamohelo ea batho ba LGBTIQ+ naheng ea Lesotho.
“Litlhaselo tsena li ka thoko ho molao oa motheo, ebile ha li na botho ha re shebile litokelo tsa ho ntša maikutlo le litokelo tsa mantlha tsa botho. Re etsa khoelehetso hore litaba tsena li nkeloe likhato tsa molao ’me baetsi ba nkeloe likhato tsa molao.” Polelo ea The People’s Matrix Association e baleha joalo.
