PARAMENTE E TŠOHLA TŠOARO EA MOJAPELA
Ka Moipone Makhemeng
La 18 Mphalane 2023
Setho sa Paramente ebile e le moeta-pele oa Kanana ea Basotho (Socialists Revolutionaries -SR) Adv. Teboho Mojapela o tlalehoa a tšoeroe motšeare kajeno ke sepolesa se hlometseng sa matšolo a ikhethang (Special Operation Unit – SOU) kajeno a le tseleng e lebang paramenteng.
Ho ea ka setho sa SR, se boneng ha a tšoaroa, monghali Pae Tlale o re ho bonahetse sehlopha sa mapolesa se neng se eme tseleng se bonahala se emetse bona. O hlalosa a bone ha mapolesa a mo qhoba, a tšoere merathatha ea lithunya a tsamaea ka eena.
Ho sa le joalo, koranta e ile ea teela motlatsi oa moeta-pele oa SR monghali Tlohang Aumane ho utloa mabaka ao moeta-pele a tšoeroeng ka ‘ona. O hlalositse hajoale ba le tseleng e lebang ntlo-kholo ea sepolesa ho utloa sesosa sa tšoaro ea Mojapela kaha hajoale ba e-so be leseling.
Monghali Tlohelang Aumane, motlatsi oa moetapele oa SR
Ho sa le joalo, ha paramente e lula kajeno, setho sa paramente, Mootsi Lehata o ile a ema ka ntlha ea tsamaiso a tlaleha hore setho sa bona sa paramente, Teboho Mojapela o tšoeroe. “Ha se eena feela, maparamente a mangata ka mona ha a eo, a ikisitse sepoleseng hore le ‘ona a ts’oaroe. Ha a eo maparamente ka mona hoba a tšohile.
Lehata o itse ho ea ka molao o tsamaisang maparamente, mapolesa ha a na tokelo ea ho tšoara litho tsa paramente ha li le tseleng e lebang mosebetsing e leng ntlong ea paramente.
O bile a tlatsoa ke litho tse ling tšisinyong ea hore paramente e khefutse ho lumella motsamaisi ho fuputsa taba ena.
Motsamaisi oa lipuisano, Tlohang Sekhamane o bontšitse taba ea tšoaro ea Mojapela e le lehoetla ho eena. A bontša litho hore o tlo nka khato ea ho batlisisa taba ho e fumana hantle, hore a kene lipakeng e le ho sireletsa litho tsa paramente.
Litho li ile tsa tsitlalla hore ntlo e khefutse ‘me Sekhamane o ile a lumela ho khefutsa ntlo nako ea hora hore a il’o ithuta maemo a renang.
