PAKI E HLALOSA TSA POLAO EA MOTHIBE, NTSANE
La 24 Loetse 2024
Leihlo la Basotho
Nyeoe ea polao ea mohlanka oa paramente, Mothibe Mothibe ea neng a bolaoe le mosali e mong Thomello Ntsane ba le Mokema ka la 20 June 2023 e tsoetse-pele Lekhotleng le Phahameng kajeno moo paki-motšoaeli, Sekhobe Maama (23), oa Mokema, tlasa morena Tekeeki Maama a faneng ka bopaki.
Baqosuoa nyeoeng ena ke Mothusi Klaas, Sootho Liphoto, Moabi Sesioane le Kamo Phakoe. Ba boela ba qosoa ka polao ea seboholi sa mehleng, Ralikonelo Joki. ‘Nyeoe e mametsoe ke moahloli Tšeliso Mokoko.
Maama o boleletse lekhotla hore o tseba tsa polao ea Mothibe le Ntsane hoba o ne a le teng ha ba bolaoa.
Kamor’a ho nka kano, paki e ile ea botsoa hore na e tseba baqosuoa ba kapel’a lekhotla ‘me ea re e ea ba tseba hobane bashana ba habo motseng oa Mokema.
Paki e ile ea supa baqosuoa ea re ke Mothusi Klaas, Sootho Liphoto, Moabi Sesioane le Kamo Phakoe.
E ile ea hlalosetsa lekhotla hore ha polao e reroa e ile ea tseba.
Maama o re ka la 18 June 2023, ha a chaisa mosebetsing moo a neng a sebetsa Mokema Clinic o ile a kopana le Mothusi Klaas a le shopong ea Moabi Sesioane.
O re ke mona moo Mothusi a ileng a mo botsa hore na Mothibe Mothibe ke motho ea ntseng a le teng motseng moo ‘me a fetola ka hore eo o ntse a le teng.
“Ke moo Mothusi a ileng a mpotsa hore na ke qetetse ho bona abuti Mothibe neng Ka be ke mo bontša hore e se e le nako ke sa ‘mone feela e ntse e le motho ea teng motseng mono.
“Eaba o re ke mo thuse ho mo shebisa eena empa qetellong a re na nka ba le linomoro tsa hae. Ke ile ka ‘motsa hore na o isa linomoro tsa abuti Mothibe kae, a ba mpolella hore o li hloka ka thata, a mpolella hore Mothibe o hloka ho bolaoa.” Paki e bolella lekhotla.
O re hamorao o ile a letsetsa Mothibe ea ileng a mo joetsa hore o ntse a le teng hahae. O re o ile a kopa hore ba ke ba il’o noa joala ka thoko ho motse oa Mokema kaha o re o ne a borehile.
O hlalosa Mothibe a ile a mo tšepisa hore ba tla tsamaea empa hamorao a mo letsetsa a re ba tla bona hosane hore na ba ka tsoela hokae.
“Ha ke ntse ke bua le eena ke ne ke na le Tšepang Monatli kapa Sampo le Mothusi Klaas.” Paki e rialo.
Paki e re e ile ea botsa Mothusi hore na hobaneng Mothibe a lokela ho bolaoa ‘me eo a araba ka hore Mothibe oa sokolisa.
O toboketsa hore ka le hlahlamang ha a ka kopana le Mothibe leha e le ho letsetsana.
Ka la 20 Phuptjane 2023 paki e re e ile ea tloha Mokema ea leba Khubetsoana ho ausi oa eona, ha e tloha moo ea leba Tip-Top ho ea shebella bolo. Moo ke haufi le boemelo ba likoloi tsa Roma. O supa a tlohile moo a leba hae Mokema e se le bosiu a tsamaea le e mong Khetšo eo a mo fumaneng Tip Top.
O re ha a le tseleng bo-Mothusi le Sootho ba ile ba mo letsetsa ho utloa hore na o hokae ‘me a re o tseleng.
O re o fihlile Mokema likoloi li se li felile empa a letsetsa 4+1 ea Rapelang ea ileng a fihla ho tla ba nka Mahlabatheng ho ba isa Mokema. Rapelang o ile a isa koloi ha bo-eona a tsamaea le bona.
Oa hlolosa: “Ha re fihla Mokema hang ka fumana mohala o tsoang ho Mothusi le Sootho, ba re na ke hokae. Ka ba joetsa hore ke qeta ho fihla Mokema, ke motseng o bitsoang mabenkeleng. Ba re ke tla ba fumana ba nkemetse mabitleng a motse pela ha ntate e mong.
“Ke ne ke na le Rapelang le Khetšo ha ke kopana le bo-Mothusi mane moo ba itseng ke tla ba fumana teng, Khetšo o ile a tsamaea ka sala le Rapelang.
“Ho fihleng hoa ka ho bona, ba ile ba ntjoetsa hore motho (Mothibe) eane eo ba itseng ke mo shebe ba mo fumane.
“Ke ile ka ba botsa hore o kae, eaba ba re o teng ka motseng. Ke tsamaile le bona re le bane. Rapelang le Sootho ba ile ba sala sebakeng se bitsoang Corner Pocket, eaba ‘na ke isa thepa eo ke tsoa e lata ho khaitseli ea ka Khubetsoana lapeng, ka tsamaea le Mothusi.
“Re ile ra isa lipolasetiki lapeng ‘me lebaka leo Sootho le Rapelang ba ileng ba sala, e ne e le ho kata abuti Mothibe.
“Ha re khutla re le tseleng, e ne e le ha koloi ea abuti Mothibe e feta pela ha ntate Setabele. Ke hlakise hore ha ntate Setabele ke pela Corner Pocket. Ha re fihla Corner Pocket koloi ea abuti Mothibe e ne e kena motseng. Nako e ne e le bosiu haholo leha ke sa e hopole hantle.
“Ha koloi ea abuti Mothibe e se e nkile tsela e lebang Ha Rampoetsi, re tlohile Corner Pocket re le bane re latetse tsela ea maoto feela re leba moo koloing. Re tsamaile e le ‘na, e le Mothusi, Sootho le Rapelang.
“Re setse koloi eo ea abuti Mothibe morao, ra feta ha ntate Kostabole. Ha re qeta ho feta moo, re bone koloi ea abuti Mothibe e tjeka. Re ile ra ipata ka makhala, hape ho na le lifate mono. Eaba koloi ea abuti Mothibe e ea tla e khutlela ka motseng e tlo feta moo re neng re ipatile.
“Eitse ha koloi e tlo feta moo re ipatileng, Mothusi le Sootho ba qalella ho thunyetsa koloing ea abuti Mothibe, e mong le e mong o ne a thunya ka sethunya sa hae. Ha ba ntse ba thunya, ba ne ba matha lephakong la eona mona ka lehlakoreng le le leng.
Sekhobe Maama o fana ka bopaki [Image – Public Eye
“Eare ha koloi e oela ba tsoela-pele ho thunya. Eaba rea atamela ‘na le Rapelang. Ho fihleng hoa rona pela bona ba ne se ba emisitse ho thunya.
“Sootho o ile a bula buti ea koloi eo hore ba kene ka ho eona. Mothusi o ile a mo sala morao, ba kena ba e secha. Ba ile ba nka joala, ba nka fono le wallet le sethunya. Ha ba qeta ba ile ba re neheletsa lintho tseno hoba rona re ne ntse re le kantle ho koloi.
“Ba ile ba tsoa ka koloing ha ba qeta, eaba ba nka lintho tsane tse ho rona tseo ba li ntšitseng ka koloing. Ha re tloha koloing re tsamaile re le bane e le ‘na e le Mothusi, Sootho le Rapelang. Thepa eane eona e ne e le matsohong a Mothusi le Sootho. Ba ile ba lahlela likarete le ID ea hae makhaleng.” O teka bopaki.
O phethela bopaki ka ho supa hore ba ile ba tloha sebakeng seo ba leba sekontiring moo koloi ea Sootho e neng e le hona teng e khannoa ke Sampo (Tšepang Monatsi). O re Mothusi o ile a fa Sootho lithunya tse peli eaba Sampo oa theoha ho palama Sootho ea ileng a ba siea moo ka koloi eo.
O re eena le Mothusi le Rapelang ba ile ba lata koloi ea Rapelang ba leba Korokoro.
