OFISIRI EA NMDS KHOTLA KA TJOTJO EA M40,100
Ka Moipone Makhemeng
La 6 Tšitoe 2023
Mosebeletsi oa Lefapha la Lihlapiso, National Manpower Development Secretariet (NMDS), ‘Mamoletsane Evelyn Sejojo (60) ea lulang Ha Mabote, Berea haufi le Mabote Police Station ha morena oa sehlooho ‘Mamolapo Majara o hlahile lekhotleng la ‘Maseterata Maseru maobane a qosoa ka ho amohela tjotjo e kaalo ka M42 100 ho baithuti ba National University of Lesotho.
Lekhotla le re ho amohela tjotjo ena ho bakile hore NMDS e lahleheloe ke M230,300 ho baithuti ba bararo bao a ileng a ba etsetsa likonteraka tsa lihlapiso ka bokunyata.
Sejojo o tjametsoe ke letoto la liqoso tse hlano. Qoso ea pele e re lipakeng tsa ‘Mesa le Motšeanong 2021, o ile a amohela M10, 000 ho tsoa ho Nthatisi Futho, ea neng a batla hore moqosuoa a mo etsetse konteraka ea ho fumana lihlapiso tsa ho ithuta NUL ka thoko ho molao. NMDS qosong ena e lahlehetsoe ke M46, 060 ke ho lefella Futho sekolo ka thoko ho molao.
Qosong ea bobeli; lipakeng tsa Loetse le Mphalane 2021, moqosuoa o ile a nchafaletsa Futho konteraka ‘me a boela a amohela M10 000 ea tjotjo hore eo a tsoele-pele ka lithuto. Boemong bona, NMDS e lahlehetsoe ke M46,060 ea selemo sa lithuto sa 2021/22.
Ho ea ka qoso ea boraro, ho thoe moqosuoa o boetse lipakeng tsa Loetse le Mphalane 2022 o amohetse M10 000 ho tsoa ho Futho hore a nchafatse konteraka ea hae. Ka bobolu bona NMDS e boetse ea lahleheloa ke M20, 830 bakeng sa selemo sa lithuto sa 2022/23.
Moqosuoa o tobane le qoso e ‘ngoe ea bone; eona e supa hore ka 2021 haufi kapa NMDS seterekeng sa Maseru, moqosuoa o boetse a amohela tjotjo ea M10 000 ho tsoa ho moithuti e mong, ‘Mantisa Mphoma Makaoane hore a mo etsetse konteraka a tsebe ho ea ithuta NUL. Ke bobolu bona, NMDS e lahlehetsoe ke M46, 060 bakeng sa selemo sa lithuto sa 2021/22.
Ho sa le joalo, qoso ea ho qetela ea bohlano, Sejojo o qosoa ka ho amohela masiba-a-limpshe a kaalo ka M2, 100 ho tsoa ho moithuti e mong hape-hape – Themba Mapepeng. Mona le teng moqosuoa o ne a rekoa ho etsetsa eo konteraka ea hore a fumane lihlapiso tsa ho ithuta NUL. Qoso e re NMDS e lahlehetsoe ke M46,060 bakeng sa selemo sa lithuto sa 2020/21.
Moqosuoa o lokollotsoe ka beile ea M10 000 tlasa lipehelo tsa hore a se kena-kenane le lipaki tsa mofapa-hlooho le ho beha paneng thepa e seng chelete ea boleng ba M20 000 ‘me o tla boela a hlaha khotla ka la 19 Tšitoe 2023.
