‘NYEOE EA PETO E HLAHISA TŠOBOTSI E ‘NGOE
Ka Moipone Makhemeng
La 22 Hlakola 2024
Monna oa Mosotho, David Moshateng Ngakane (46) ea phelang Motimposo, Maseru o hlahile lekhotleng kajeno ka pele ho ‘Maseterata oa Maseru, Thamae Thamae a qosoa ka ho hlekefetsa mosali oa Motimposo ka motabo. Mochochisi ke Keketso Motiki.
PC Mojakisane ha a teka bopaki ba hae ba sehlooho o bontšitse hore ka la 21 Phuptjane 2022 motebong oa sepolesa Ha Thamae, ho ile hoa fihla ho eena mosali oa Mosotho ea ileng a ipolela mabitso, a re o phela Motimposo Maseru. Molli o ile a supa hore o hlekefelitsoe ka motabo ke monna e mong.
O re tlhaloso e fanoeng ke ‘melaeli, ke hore o ne a tsoa ntlong ea mothamahane e bitsoang Shelly Brown, Ha Thamae moo a ileng a qabana le mohlankana oa hae a mo siea moo a leba hae lihoreng tsa hoseng. O bontšitse hore ke moo eitseng ha a fihla mothehong oa Ha Thamae a ileng a kopana le banna ba bararo ba neng ba ikoahetse lifahleho ka limonkoana.
O re e mong oa bona o ile a mo atamela eaba oa mo suthumetsa hoo a ileng a oela fatše. Molli o ile a bolella sepolesa hore monna eo o ile a mo laela ho tsamaea le eena ho ea ha hae empa khabareng ha ba fihla mabitleng a Lower Thamae eo o ile a mo tsohela matla a mo beta.
Paki e re molli o ile a hlalosa moetsi oa ketso e ne e le monna e motšo, e molelele ea lentsoe le tebileng kapa le letenya. O boletse hore monna eo o ne a apere thopo e meruni e nang le botšo, a roetse semonkoana sa lesela se pherese se nang le bosoeu a bile a roetse katiba e pinki. O re ka kamora tlaleho ena o ile a thakhola lipatlisiso tse ileng tsa mo lebisa ho moqosuoa.
“Ka la 7 Phupu 2022, molli o ile a fihla hape ofising Ha Thamae a tlaleha hore motho ea mo hlekefelitseng o ‘mone ebile a ka re supisa moo a lulang teng.” Paki ea hlalosa.
Ha a tsoela-pele o itse eena le PC Masupha ba ile ba leba lapeng la bo-moqosuoa Motimposo moo ba fihlileng ba itlhalosa hore ke mapolesa ba nt’o mo hloma lipotso. O re ba ile ba mo batla tlhaloso holim’a litaba tseo a belaelloang ka tsona empa ‘melaelloa o ile a fana ka tlhaloso e sa khotsofatseng. Ke moo ba ileng ba mo isa motebong oa sepolesa ho mo fatisisa lipotso.
O tsoetse-pele hore o ile a utloa a sa khotsofalla tlhaloso ‘me ba leba lapeng ha bo-moqosuoa lekhetlo la bobeli ba tsamaea le molli ho lo batla liphahlo tse boletsoeng ke molli. O re ba ile ba li fumana thopo e meruni e nang le botšo, semonkoana sa lesela se pherese se nang le bosoeu.
“Ke ile ka fumana le katiba e pinki. Ke ile ka botsa moqosuoa hore na liphahlo tseo ke tsa hae eaba oa lumela hore ke tsa hae. Ke ile ka nka liphahlo ho ea li boloka e le bopaki ‘me ka khutlela motebong oa sepolesa hammoho le ho tšoara moqosuoa; eo ke ileng ka mo balla qoso ea tlhekefetso, ka nt’o mo koalla.” Paki e rialo.
Mochochisi Motiki o ile a laela hore paki e nehelane ka liphahlo tseo kapele ho lekhotla e le bopaki ‘me hoa ba joalo.
Ho sa le joalo, moqosuoa ea neng a ipuella, o latotse bosehla hore mapolesa a fihlile lapeng ha hae a le mabeli le ho mo bolella litokelo tsa hae. O teketse lekhotla hore mapolesa a fihlile ho eena a le mahlano moo a bileng a mo hlokofatsa le ho mo fasa.
Paki e itse mapolesa a ile a e bolella hore a batla borikhoe ba Dickies le lieta tsa All Star. O behile kapele ho lekhotla hore o ile a lumella mapolesa ho kena ka tlung hore a li shebe empa a se li fumane kamora ho phahlolla.
Ke moo lepolesa le leng le ileng la bona thopo e ntšo betheng eaba le ea ‘motsa na ke ea hae ‘me a lumela. Ke moo a ileng a e nka a re a ntse a batlana le eona. Ho feta mona, moqosuoa o re katiba e pinki eo mapolesa a e fumaneng moo a lulang ke ea ‘m’e oa hae.
Ho feta mona, ha a fana ka boitšireletso ba hae, moqosuoa o bontšitse a ile a kopana le lehlasipa mesong ea la 19 Khoeling e seng e boletsoe a bonahala a lemetse ebile borikhoe ba hae bo le litšila a bile a lla.
“Ke moo ke ileng ka hlokomela hore re tsamaea tsela e le ‘ngoe ‘me re tsamaea ‘moho. Ho ne ho se ho bonahala. Ke ile ka mo botsa hore na ho etsahalang ha a bonahala a lemetse ‘me a mpolella hore o hlekefelitsoe ebile o utsoelitsoe fono le chelete.
“Ke ile ka ‘motsa hore na o tseba batho ba mo hlekefelitseng eaba o nkaraba ka hore ke bo-ntate ba tsamaeang ka Honda Fit e ntšo.” Oa hlalosa.
Ho feta mona, moqosuoa o boleletse lekhotla hore o ile a eletsa lehlasipa ho tlaleha ketsahalo eo sepoleseng. A re o ile a makala feela ha mapolesa a fihla ho eena a mo qosa ka tlhekefetso ea motho eo a neng a ntse a mo tšelisa le ho mo eletsa.
“Ke be ke hlakise hore letsatsing leo, ke ne ke apere lamba e tšoeu, katiba e ntšo ea wool ea Adidas, tracksuit ea Adidas e ntšo e mela e mesoeu mahlakoreng le teki ea Nike e tšoeu e khubelu.” Ke moqosuoa eo a bile a thatiselletsa ka hore ke eena ea bileng a bontša lehlasipa lapeng habo.
Bopaki ba ngaka bo bonts’itse ha molli a ne a na le mongoapo lerameng.
Moqosuoa o kopile lekhotla hore lipaki tsa hae le tsona li bitsoe ‘me ke hona lekhotla le tla lokisetsa hore lipaki tse joalo li tle khotla.
Nyeoe e tla tsoela-pele ‘me moqosuoa o ntse a emetse nyeoe a le chankaneng.
