MOSALI O MOLATO OA HO CHESA NTLO EA NYATSI
ka Moipone Makhemeng
La 27 Tlhakubele 2024
Lekhotla la ’maseterata Maseru bekeng ena ka ’maseterata Nkhethoa Molapo le ahlotse mosali oa Mosotho, Relebohile Montlha lilemo tse robeli kapa ho itefella M15 000 kamora ho ipolela a le molato oa ho chesa ntlo ea nyatsi ea hae, monghali Lesole Leseteli, eo ho utloahalang a ne a se a khaotse maqhama a likamano tsa lerato mahareng a bona.
Sena se hlalosoa ke mochochisi Ratšita kakaretsong ea bopaki ba hae khahlanong le moqosuoa, boo a neng a tla bo teka hoja a ne a ipoletse a se molato.
‘Maseterata Molapo ha a balla moqosuoa qoso eo a tobaneng le eona, o boletse hore ho thoe ka la 18 Tlhakubele 2024 Ha Jemisi Makhobalo, Maseru moqosuoa o ile a chesa ntlo ea monna ea seng a boletsoe ka sepheo sa ho mo utloisa bohloko kapa ho mo senyetsa.
Montlha o ne a ipuella ‘me o ile a ipolela a le molato. O boetse a lumellana le mapaki ‘ohle a tekiloeng kapele ho lekhotla khahlanong le eena.
Bopaki bo hlalosa hore eena moqosuoa le nyatsi ea hae ba ne ba lula ‘moho ba bile ba tšepisane lenyalo. Eka hona matsatsing ao pejana ho ketsahalo ea ho cha hoa ntlo, baratani bana ba ne ba ile ba lumellana ka ho ea fata metsuntsunyane Afrika Boroa ‘me litumellano ea ba hore thepa ea bona ea lelapa e ntšoe ka tlung e behoe bahaisaneng molemong oa tšireletseho le polokeho ea eona.
Leha ho le joalo, moqosuoa o ile a makala ha monna a mo tsoa tlaase ka ho qolla thepa ea hae feela empa ea molli eona e setse ka tlung. Ke moo khang e ileng ea qhoma teng ‘me eaba karohano e hlaha hona moo.
Montlha ho hlalosoa a ile a itulela bahaisaneng. Ke moo hoseng ha la 18 Tlhakubele 2024 nyatsi e le moreneng, a ileng a nyenyelepa a kena ka tlung a nt’o hotetsa sekipa a fafatsa parafini a ba a tsoa a hotelitse ntlo.
Hang kamor’a metsotsoana a tsoile, bahaisane ba ile ba hlokomela hore mollo o qhomme ntlong ea mohaisane oa bona Leseteli. Monga ntlo o ile a utloa ha ho hlajoa mokhosi ’me le eena a atamela empa a fumana ho se ho se thuso ntlo le thepa eohle li chele lore!
Bahaisane ba ile ba mo hlabela patsana hore na moetsi oa ketso ke mang kaha a bonoe ha a nyenyelepella ntlong eo. Mahokela a ile mo tsoma a mo fumana hona letsatsi leo a nt’o nehelana ka eena sepoleseng sa Mazenod moo a sa kang a latola molato.
Mochochisi Ratšita o bontšitse hore kakaretso ea thepa ho kenyelletsa mok’huk’hu le liaparo tsa molli, boleng ba tsona ke M100 000 kaofela.
Kamora hore ’maseterata a nonye molli maikutlo malebana le ka moo a ikutloang ka teng hajoalebke ntlo le thepa ea hae tse cheleng o ile a simolla ka hore o ntse a koatetse moqosuoa haholo kaha a ile a leka ho mo thusa ho iqalla khoebo molemong oa hore a ‘ne a iphelise. A bolela hore le karohanong ea bona, o ile a fa moqosuoa M900 e le ho mo patalla ntlo ea bolulo. A supa hore se ba arotseng le moqosuoa ke setsoalle seo moqosuoa a nang le sona sa bahaisane ba mo lielang kaha a na le maikutlo a hore ke bona ba mo lihelang le ho mo susumetsa hore a etse ketso ena.
Moqosuoa o ile a fuoa monyetla oa ho ikopela mohau e le hore kahlolo ea hae e tle e bebofatsoe. Ha a ikopela mohau moqosuoa o itse ha a sebetse; o iphelisa ka ho etsa mosebetsi oa ho hlatsoetsa batho liphahlo ‘me o boetse o holisa ngoana ea lilemo li leshome.
Kamora ho mamela thapeli ea moqosuoa ea pebofatso ea kotlo, ’maseterata o ile a li beha joana; “Lekhotla lena lea sheba hore leha le u mametse hakaalo, thapeli ea hau ha u ntse u ikopela hore u fuoe kotlo e bobebe, ha ho na le lebaka le le leng le utloahalang hore hobaneng o entse joalo.
“Pelo ena ea hau e bang bohloko, u itšireletse hore e se ke ea u roala. Ho hlaloa ha se mohlolo. Lefatšeng mona batho ba lula ba arohana ha ho etsuoe lintho tse kaalo-kaalo”
’Maseterata o ile a liha kahlolo a pitla moqosuoa ka hore a hlole lilemo tse robeli chankaneng kapa ho itefella M15 000. O boetse a fanyeha halefo ea lilemo tsa kahlolo le chelete. A re sena se bolela hore moqosuoa o tla hoehla feela lilemo tse ‘ne chankaneng kapa ho itefella M7,500.
