MOOKAMELI OA MEHLENG OA SEPOLESA KE MOFU
Ka Moipone Makhemeng
La 30 ‘Mesa 2023
Major General Bolutu V. Makoaba, mookameli oa mehleng oa sepolesa sa Lesotho o tlalehoa a timetse mafelo a beke kamora bokuli. Mofu e bile mookameli oa sepolesa ho tloha ka 1996 hofihela a ea phomolong ka selemo sa 1998 .
Leihlo la Basotho le buisane le raliphatlalatso oa sepolesa, Senior Superintendent Mpiti Mopeli ho netefatsa litaba tsa ho timela hoa General Makoaba empa a fetola ka hore tafoleng ea hae pii e joalo ha e-s’o fihli ‘me a hlalosa hore lelapa mohlomong ke hona le tla etsa tsebiso ho bookameli.
Ho sa le joalo, mehloli e tšepahalang e supa hore Major General Makoaba o tla phomotsoa borokong ba ho qetela Ha Tšosane, Maseru ka la 6 Motšeanong 2023.
Mosebetsi oa Makoaba ho okamela sepolesa haholo ka selemo sa 1997 o bile le liqholotso tse kholo kaha a ile a lelekoa mosebetsing ke litho tsa boemo bo tlaase tsa sepolesa tse ileng tsa mo leleka tsa boela tsa nka taolo ea sepolesa ka tsela ea borabele nako e fetang beke.
Marabele a mapolesa a ne a phatlalatse a tebetse Makoaba ka la 5 Hlakola 1997 empa ka thuso ea ‘muso oa tonakholo Ntsu Mokhehle le sesole borabele boo bo ile ba felisoa ‘me ka la 18 Hlakola 1997, Makoaba o ile a khutlisetsoa setulong sa bookameli.
Ho sa le joalo Makoaba o tlisitse liphetoho tse ‘maloa sepoleseng tsa Sesotho joaloka ho felisa junifomo ea sepolesa e sootho a tlisa ena e putsoa e aparoang hajoale.
