BANTU E NKA SEJANA LE M200 000
Ka Moipone Makhemeng
Maobane e ile ea ba se-mphete-ke-u-fete e le masiea-sieane-ma-hloka-lebelo ea se nang sekatja ‘m’ae a tele, a telle motella -ruri Setsoto Stadium Maseru ha Bantu FC “A Mantšo Matebele” e lebanya litheko tsa marumo le Lioli FC “Tse Nala” moo ho neng ho tsekoa sejana sa People’s Cup le bokholokhotho ba chelete. Mohope o ne o tšehelitsoe ke Econet Telecom Lesotho.
Kamora hore marena a mabotho ana a mabeli a ntše taelo ho bahlabani ba bona ‘me metsotso e supileng monghali Osiase Koto a letsitse phala ho qala ntoa, ka Makaoteng mohlankana ea pepang nomoro ea leshome le metso e ‘meli, Thabo Lesooana o ile a nka thomo a hlaba bohlasa, ea eba thabo le monyaka ha Lesooana a tlohela bosaoana a hloma makaota pele.
Boha pokello ea lifoto e ea latela:
Lioli vs Bantu
Letona la Lipapali, Pitso Lesaoana
E mong oa bats'ehetsi
Lets'oele la Bantu
Bantu FC
Tona-kholo e lumelisa libapali
Lets'oele la Lioli
Sethaba-thibane sa Lioli
Dennis Plaatjies, Mookameli oa Econet
Liol iFC
Lets'oele la Bantu
A Mats'o Matebele
Bantu e hapile M200 000
Lioli e hapile M100 000
Bantu e nkile mohope
Litsikitlano tsa meno li ile tsa aparela bana ba morena Masupha feela ba hana ka bona ba re litsietsi li ke ke tsa ba aparela. Ke moo eitseng ha li boea sekoele joale ha bohanahala hore tse nala li kakatletse ka thata li batla ho busetsa molamu sefateng empa Makaota eaba a koetse ka thata ho thibela sena.
Makaota a ile a khutla a kokositse marumo eaba motšepuoa e moholo le eena nakong ea Maburu Posholi Leluma, a nyakalla Makaota ea ka ho hlabuoe khomo ha bo bona ka mora ntlha ena. Joale ba bonela moqhaka oa tlholo haufi.
Kaha le motsotsong oa ho qetala le moetsa-libe o’a kena leholimong ke moo tse Nala li ileng tsa iphumanela ntlha ea tsona e ba hlakolang litlhong kamora hore oa bona oa morao monna Thejane Thejane a tle a e kopanye le letlooa metsotsong e meraro ea mohau eo monghali Koto a ileng a nehelana ka eona ‘me papali ea feela joalo A Matšo Matebele e le bona bahloli ba hapile joalo bokholo-khotho ba chelete e kaAlo ka M200 000 le sejana ha Tse Nala e le boemong ba bobeli ka M100 000.
Ha e le ntoeng ea boemo ba baboraro Linare FC e ile ea thulana ka liphatla le LDF ‘me eona ea atleha ho fumana boemo boo ka ho hlaba bao ba lireng lintlha tse tharo ho tse peli.
Mona teng ka lehlakoreng la Linare FC, lintlha li kene ka Norman Kumatse, John Mofokeng le Michael Mireku ha lintlha tse hlahileng ka ho LDF tsona li kene ka Lebese Lebese le Leruo Lethunya.
Basotho ba ne ba phuthehile ka bongata bo hlollang ka mora lilemo tse telele ho se bolateli bo tjena ho boha papali ea tlholisano kapa ea liki feela.
Mokoetlisi oa Lioli FC, o ile a lebohisa Bantu ‘me a bontša hore o khotsofetse haholo ke tsela eo libapali tsa hae li bapetseng ka teng. A bontša hore papali ena ha e ea ba bobebe ho mahlakore ka bobeli le ha ho le joalo Bantu e ile ea khona hore menyetla eo ba e fumaneng ba e sebelise ha bona ba ile ba hloleha lehoja ba bile le menyetla e joalo pele.
Ha a qetella litaba tsa hae o bontšitse hore sehlopha sena se hahuoe ka batho ba bacha ‘me o sebelisitse libapali tse seng li na le boiphihlelo ka lebatama leo papali e neng e le ho lona.
