MONNA OA LESOTHO O PITLOA LILEMO TSE 54 TORONKONG
Ka moqolotsi oa rona
La 5 Tšitoe 2023
Lekhotla le Phahameng la Western Cape, Cape Town, le ahloletse ‘molai oa senokoane oa Lesotho, Seabata Clement Kholoane (41) ho hlola chankaneng lelimo tse 54 kamora ho mo fumana a le molato oa polao le letoto la bosholu ba boqhobane moo a neng a sebetsa Mossel Bay, Cape Town.
Kholoane o ne a tobane le qoso ea polao ka maikemisetso le liketsahalo tse hlano tsa bosholu ba boqhobane hammoho le ho lula Afrika Boroa ka thoko ho molao.
Raliphatlalatso oa Lefapha la Bochochisi Cape Town, (National Prosecuting Authority – NPA), Eric Ntabazalila o re Kholoane o ile a kena Afrika Boroa lipakeng tsa la 20 Motšeanong 2022, le la 16 Loetse 2022, a kena a na le tumello ea nakoana ea ho lula Afrika Boroa (VISA), ‘me o lutse moo hofihlela VISA ea hae e felloa ke nako empa a tsoela-pele ho lula ka thoko ho molao.
Ntabazalila o re Kholoane o ne a sebetsa k’hamphaning ea I Property (Pty) Ltd, e leng k’hamphani e rekisang le ho hirisa matlo tikolohong ea Pinnacle Point Golf Estate, Mossel Bay, Cape Town.
Ntabazalila oa hlalosa: “Kholoane o entse maipolelo a re ka la 21 Motšeanong 2022, o ile kena liofising tsa Pinnacle Point Security Estate a sebelisa karete ea hae ea mosebetsi e neng e mo lumella ho kena moo. O re kamora ho kena, o ile a fetela 147 Sunset Drive, moo a ileng a utsoa komporo ea laptop, mothamahane (whisky) le liphahlo.”
Moqosuoa o tlalehoa a ile a pata thepa ea bosholu ka koloing eo a ileng a e fumana sebakeng seo eaba o tsoa ka keiti e kamorao. Hamorao o ile a rekisetsa batho thepa ea bosholu sebakeng sa Kwanonqaba. Ke moo a ileng a tšoaroa ka la 24 Motšeanong 2022 ‘me a supisa mapolesa moo a rekisitseng thepa teng. Sepolesa se ile sa phutha thepa eo. O ile a hlaha khotla eaba o lokolloa ka beile.
Ho feta mona, ka la 3 Phuptjane 2023, Kholoane o ile a hlasela lelapa la metsofe e ‘meli; ntate-moholo Johannes (86) le nkhono Marietha Willemse (79), bao a kileng a ba sebeletsa. Mona o ile a fumana nkhono ka tlung eaba nkhono o nka thipa o leka ho tšosa Kholoane empa eena a phakisa a phamola thipa ho nkhono a nt’o mo nyekenya ka eona makhetlo-khetlo.
Nkhono Marietha Willemse, 79, o ile a shoa kamora ho nyekenngoa ka thipa ke moqosuoa athe molekane oa hae Johannes, 86, eena o ile a lematsoa ke moqosuoa tlhaselong e bileng lapeng la bona [Image Supplied]
“Ntate-moholo o ile a leka ho thiba Kholoane ha a ntse a nyekenya mosali oa hae ka thipa empa o ile a tjekela ka ho eena a mo hlaba ka eona. Nkhono o ne a shoe ke maqeba a thipa kamora tlhaselo eo.
“Lipakeng tsa la 6 le 9 Phuptjane 2022, moqosuoa o boetse a hlasela lapeng la Jacobus Hermanus Robbertze, 147 Sunset Drive, Pinnacle Point, moo a ileng a utsoa joala, lithaole le liferekikiri (binoculars). Ka la 3 Loetse 2022, o boetse a pshatla ntlong e 71 Eastwood Drive, Pinnacle Point, moo le teng a kileng a sebetsa, o boetse hape a thuha a kena ntlong ea House B, ka la 16 Loetse 2022, Cullinan Street ka matjeke a utsoa thepa. Ntlong e ‘ngoe o ile a utsoa tse latelang: selefounu, laptop le mokotla oa eona, liphahlo, Casio edifice, Zippo lighter le mochini o kutang litelu.
“Malapeng a mang moo a neng a bolaea, moqosuoa o ne a siea mophula oa mali, a ba ine letsoho maling ebe o manamisa letsoho le menoana e mali maboteng ho taka ka mali. Ha a bona hore sepolesa se mohlaleng oa hae, o ile a balehela Lesotho empa qetellong sepolesa sa mo qhautsa a le Wepener, Foreistata ka la 7 Tšitoe 2022 ‘me a khutlisetsoa Mossel Bay ho araba matjala a hae.” Ntabazalila o boletse joalo.
Akhente ea bochochisi, Adv. Lenro Badenhorst o ile a kopela moqosuoa kahlolo e boima kaha a re o ne a hlasela malapa ao a kileng a sebetsa ho ‘ona a tseba tsohle ka ‘ona. O re ka ho khetholoha o hlasetse metsofe a bolaea nkhono ea lilemo li 79.
Ho sa le joalo, lekhotla le ile la mo ahlola ho hlola chankaneng lilemo tse 54 empa lilemo tse ling li tla tsamaea ‘moho ‘me o tla hoehla lilemo tse 37 feela.
– IOL
