”MOLAI’ OA FAKO O BUA MASA-A-KOKOMETSE
… O RE MOFU O SHOELE KA LEBAKA LA LEQHOKO
Ka Moipone Makhemeng
La 13 Mphalane 2023
Tebello Khabo (37) oa Lithabaneng Ha Keiso, Maseru, moqosuoa polaong ea moparamente oa mehleng, mohlomphehi Fako Moshoeshoe (53), o ngolletse Lekhotla le Phahameng la Maseru mokhoepha oa lengolo la tletlebo (petition) kajeno kamora ho hlaha ha khutšoane ka pele ho ‘maseterata Motlatsi Kolisang.
Khabo o qosa Mochochisi e Moholo (Hlalefang Motinyane) ‘me o batla lekhotla le mo laele ho mo lokolla ka beile.
Adv. Hlalefang Motinyane, Mochochisi e Moholo [Image – Moipone Makhemeng-Leihlo la Basotho
A thusoa ke leqoetha la hae, Adv. ‘Masentle ‘Musi-Mosae, Khabo o batla a lokolloe ka beile tlas’a lipehelo tse latelang; hore a lefe M1, 000, a be a iponahatse lirimanteng hararo ka khoeli hobane o re o maphatha-phathe ke mosebetsi oa hae.
O boetse o itlama ho itlaleha motebong oa sepolesa sa Pitso Ground lipakeng tsa hora ea botšelela hoseng (6am) ho isa ho ea botšelela mantsiboea (6pm). O tšepisa hore a ke ke a kena-kenana le lipaki tsa mofapa-hlooho.
Taba-kholo eo Tebello a kopang beile ka eona ke hore ka la 11 Mphalane 2023, o isitse mosali oa hae Maseru Private Hospital kaha e le mokhachane ea ka ‘nang a pepa neng kapa neng ‘me o batla beile hore a tsebe ho thusa mosali oa hae ka seo a ka se hlokang nakong ena eo ba lebeletseng ngoana oa boraro.
Khabo o hlalosetsa lekhotla se etsahetseng ha a tla bolaea Fako ka sethunya:
“Hang hore ke fihle moo kamora ho letsetsoa ke Amohelang (mosali ea chaisitseng koloi ea Fako Moshoeshoe), ho ile hoa fihleloa tumellano ea hore Amohelang a khanne koloi ea ka a late mapolesa Pitso Ground Police Station. Eaba re lumellana hore ‘na le mofu re sale mono, re emele sepolesa se neng se il’o latoa ka koloi ea ka ke Amohelang.
“Mofu o ile a lumellana le seo eaba re sala le eena. ‘Na ke ile ka lula ka koloing ea Amohelang ka setulong sa moqhobi ‘me eena a ea ho ea hae, a lula le batho bao a neng a ntse a tsamaea le bona.
“Ha ntse ke lutse ka koloing ea Amohelang, ke bone mofu a theoha koloing ea hae a kokositse sethunya a tla ho ‘na eaba o qalella ho ntlhapaola ka mahlapa a tala, a bile a ntšupile ka sona.
Maletsunyane Mpesa
“O ile a ntaela hore ke theohe koloing ea Amohelang, a bile a k’hokile sethunya sa hae. O ile a re ho ‘na: ‘rapela pele u kopana le balimo ba hau.” Khabo o rialo lipampiring tsa lekhotla.
Litaba tsa akhente li tsoela-pele: “Molli o ile a theoha koloing ea Amohelang a tšohile haholo eaba ka mohlolo o hula sethunya sa hae se molaong a thunyetsa ho mofu, a thunya feela, a ba a thunya feela.
“O ne a tšohile haholo eaba oa baleha sebakeng sa ketsahalo a tšoha hore mofu le bao a neng a na le bona ba ka tšoana ba mo fumana ba mo lematsa. Molli o ile a baleha joalo a ea Pitso Ground Police Station moo a ileng a tlaleha ketsahalo ena hona teng.
“Ke beha ho lekhotla le khabane hore molli o ne a se na morero le maikemisetso ka tsela efe kapa efe hore ebe mofu o kopane le lefu la hae pele ho nako. O re o oetsoe ke bomali-mabe hoba o ne a se na maikemisetso afe kapa afe ho bolaea mofu. O bontša seo se bakiloe ke leqhoko la eena mofu.
“The deceased caused the whole dramatic situation for no good cause as we were waiting for police.” Akhente e ngotse joalo ka Sekhooa.
E boela e supa hore molli o hlokile boikhethelo ha a tla thunyetsa ho mofu a ‘molaea ho latela hore o ne a mo supile ka sethunya a mo hlapaola a bile a re a rapele balimo ba hae pele a kopana le bona.
Ho sa le joalo, leqoetha le kopa hore lekhotla le amohele hore molli o re o soabile ka se etsahetseng ‘me o itlama hore lelapa la bo le tla etela la bo-mofu hore ho buisanoe.
O re molli o ikemiselitse ho pata mofu ka ho jara litšenyehelo tsa lepato.
