‘MOKHOTHU A THIBELOE HO BA TONA-KHOLO KA LEBAKA LA BOMENEMENE’
Ka Moipone Makhemeng
La 31 Mphalane 2023
Monna oa Mosotho oa Ha Motolo, Sehlabeng sa Thuathe, Berea, Thabo Makoala o hlahletse nyeoe Lekhotleng le Phahameng o tseka hore lekhotla le thibele moeta-pele oa bohanyetsi, ebile e le moeta-pele oa Democratic Congress, Mathibeli Mokhothu ho ba Tona-Kholo ea Lesotho.
Baikarabelli ka tlhahlamano ke Mathibeli Mokhothu, Motsamaisi oa Lipuisano Ntlong ea Bakhethoa, Mongoli e Moholo oa Ntlo ea Bakhethoa, Tona-Kholo le Ramolao e Moholo oa ‘Muso.
Lekoala o re o ritela nyeoe ena e le monna oa Mosotho ea ngongorehileng a bile a hlokomela hore taba ena ke ea bohlokoa kahara naha. Lipampiring tsa lekhotla, molli o re ho bonahala ho se motho oa maemo a phahameng sechabeng kapa oa boemo ba lipolotiki ea bonahalang a na le tšusumetso kapa thahasello ho tlisa tabahali ena ka pela lekhotla.
“Ka nyeoe ena ke lakatsa ho hlomphisa batho molao oa motheo temaneng ea bobeli. Sena ke ho thibela batho ba nkoang e le bahlomphehi ho bupetsa molao oa motheo oa naha ena.
“Ke boetse ke batla hore matla a molao oa motheo a apesitsoeng paramente a hlahlojoe e le ho tlisa boitšoaro bo botle, mohlala le tlhompho ea molao.” Lekoala o rialo.
O re o hlokometse hore bohanyetsi bo kentse tšisinyo ea tlhoko-tšepo ho ‘muso oa tona-kholo Sam Matekane, ‘me morero oa bohanyetsi ke ho hlomamisa moikarabelli oa pele (Mathibeli Mokhothu) e le tona-kholo.
Molli o re o na le letsoalo hore ha tšisinyo e ka fetisoa, bohanyetsi bo tlo hlola ‘muso kaha bo bonahetse bo na le lipalo tse imelang tsa ‘muso.
“Ke rata ho bontša lekhotla le khabane hore moqosuoa oa pele o ile a qosoa a ba fumanoa a le molato qosong ea bomenemene ke lekhotla la ‘masetereta oa Maseru nyeoeng ea nomoro ea CR1181/07.
“Ke teka hape mona hore moikarabelli oa pele o ile a fuoa kahlolo ka la 10 Loetse 2012. Taba ea hore moikarabelli oa pele o na le rekote ea tlolo ea molao e ea tsejoa ke sechaba, ‘me ke qhoaelletse tlaleho ea nyeoe eo ho hlaha koranteng.”
Ha a phethela Lekoala o re: “Ke rata ho utloa ho lekhotla hore na e ka ba nepo hore motho ea fumanoeng a le molato oa tlolo ea molao ea botlokotsebe, haholo ba bomenemene eo botšepehi e leng taba, na a ka tšepeloa ho ba tona-kholo ea Lesotho?” Lekoala o li beha joalo a supa hore ha Mokhothu e ka ba tona-kholo taba ena e tla hlahisa naha ena hampe machabeng.
Ho ea ka nyeoe ea nomoro ea CR1181/07, Mokhothu o ne a qosoa le e mong Ntšalla Mafa ka bosholu ba bomenemene ba chelete ea Lekala la Thuto nakong eo Mokhothu a neng a sebetsa Mphaki High School, Quthing. Baqosuoa bobeli ba ne ba ipolele ba le molato joalokaha ba qositsoe. Lekhotla le ne le ba ahlole ho hoehla chankaneng lilemo tse tharo kapa ho itefella M6000 motho ka mong ekasitana le ho lefa M15, 000 motho ka mong hore e khutlele mokotleng oa ‘muso. Bobeli baqosuoa ba ile ba atleha ho lefa lichelete tseo kaofela ‘me ba qoba ho leba toronkong.
