MOJAPELA O RE RFP E IKETILE KA LESHANO
Ka Moipone Makhemeng
La 9 Phuptjane 2023
Moetapele oa Lekhotla la Kanana ea Basotho (Social Revolutionaries – SR) Mohlomphehi Teboho Mojapela, o re ‘muso o litulong ke oa batho ba jeleng naha ea Lesotho ‘metoane le ho thetsa sechaba feela.
Sena o se buile kajeno holong ea Victoria Hotel ‘mokeng oa baphatlalatsi moo a neng a il’o beha sechaba leseling mabapi le meropotso ea maparamente ea mafura a M5000 khoeli le khoeli.
Mojapela o re Revolution for Prosperity (RFP) e rokile Basotho mahloana-a-naketsana feela kaha ba pusong ba iketile ka hore ba tla felisa chelete ea mafura e M5000 empa ba le leshano.
Litho tsa komiti ea SR li lotile moetapele oa tsona
Mojapela o ile a meketsa hore eena a tlatsitsoe ke moetapele oa Khoetsa ea Sechaba sa Basotho (Popular Front for Democracy – PFD) Adv. Lekhetho Rakuoan, ba ile ba ipileletsa ho ‘muso ka tšehetso ea ntlo ea paramente hore bahlomphehi ba itlame mala-masesane ka ho hlakola meropotso e boletsoeng empa ‘muso ha oa bontša thahasello.
Adv. Mojapela o rialo hobane bekeng ena boholo ba maparamente bo fetisitse molaoana oa hore maparamente le litho tsa Senate ba itsoelle-pele ho amohela M5000 ea mafura.
Mojapela o re seo a ithutileng sona ke hore bapolotiki ba RFP ha ba na thahasello ea Basotho.
O eketsa ka hore ho tloha sethathong bao ha se bapolotiki empa ke majalefa a bobolu. O tsitlalletse hore bao esale ba le kahara bobolu ho tloha mebusong e fetileng.
“Kaha bofutsana bo jesa ntja, eitse ha ba kena mona ka liroala-nkhoana batho ba lumela hore moshe ke eo oa tla ka manna.” O beha joalo.
Ha a hatela-pele, o hlalositse hore RFP e thehiloe ka batho ba utsoelitseng naha ea Lesotho ka ho ipokella ka lithentara tsa mafura, merafo, litsela le matekoane. Kahona, a bontša hore ha ho makatse hore mohlang ba qetileng ba tla hula mok’hondo oa bona.
Ho sa le joalo, e mong oa baphatlalatsi o ile a botsa hore na joalokaha bahlomphehi Mojapela le Rankuoane ba entse tšisinyo ea ho hlakoloa hoa meropotso e boletsoeng empa ea hloleha; a botsa hore na tebello ke efe – a re na ba tlo tsoela-pele ho amohela chelete eo.
“Ha ke tsebe haeba u na le kelo-hloko hore re ntse re fumana M5000 eo khoeli le khoeli. Hore na li’a kena kapa ha li kene it’s non of our business. ‘Na ha kea tlisa lephako polotiking; ke tlisetse ho tla fetola maphelo a Basotho.
“U tla hopola hore na ke limilone tse kae tseo ke li tšetseng holim’a naha. Ka hona M5000 ha se letho hobane e ke be ea fetola bophelo ba ka kapa ba Kanana.” Ke Mojapela a fetola.
Ha a phethela litaba tsa hae Lebaibai o ipilelitse ho Basotho ho tlohela ho ea le khongoana holimo empa a re ba eme ka maoto ho thusa ‘muso ho nepa. A boele a hlokomelisa bacha hore ho ingama-ngama ho marang-rang ha se tharollo.
