Ka Moipone Makhemeng
La 24 Tlhakubele 2023
Mohoanto oa bacha ba mokha oa Socialist Revolutionaries (SR) o bohotsoe ke lintja. Sena se hlalositsoe ke komiti ea bacha ba SR e neng e epile ‘moka oa baqolotsi kajeno, Maseru ho hlalosa mabaka a nyopisitseng mohoanto o neng o lokela ho tšoaroa kajeno.
Bacha ba re morero oa mohoanto e ne e le ho isa lengolo ho Letona la Khiro le Bosebetsi mabapi le bacha ba ntseng ba lelekoa mosebetsing makaleng a ‘muso ka le reng khiro ea bona ha e molaong. Mohoanto o ne o reretsoe ho thakhoha kajeno Setsoto Stadium, o harolohe ho leba Sefikeng sa Moshoeshoe ka tsela e theosang le Seputana.
Ho sa le joalo, sepolesa se hanne ka polomiti ea hore mohoanto o tšoaroe ka mabaka a hore mohoanto ona leha o hlalosoa ke SR e le oa khotso, tšabo ke hore o tla sisinya metheo ea khotso kahara naha. Sepolesa ha se hana ka polomiti se supile hape hore boholo ba mapolesa bo ile letšolong la Pholoho ‘me mapolesa a ka laolang mohoanto a fokola.
Polelo ea bacha e bontša ha ba latetse methati e nepahetseng le ho fumana tokollo ea ho hoanta ho ‘Masepala le sepolesa empa sa khitla lejoe ha sepolesa se re ho tšoaroa hoa mehoanto le likopano ho laoloa ke molao oa likopano le mekoloko oa selemo sa 2010 kahoo ba na le letsoalo la hore ho ka ba le tšisinyeho ea metheo ea khotso.
Bacha ba Lesotho Economic Freedom Fighters
Bacha ba re likarabo tsa sepolesa li ba emisitse lihlooho kaha ba bontšitse ha mohoanto ona e ne e le oa khotso.
Bacha ba ferile polelo ea bona ka ho ipiletsa ho sepolesa ho sebeletsa sechaba ba sa natse mebala ea lipolotiki empa se sebetse ka ‘nete le botšepehi.
‘Mokeng oa kajeno, mongoli oa bacha ba SR monghali Tlale Pae, o bontšitse hore ho ne ho loketse hore ebe ho sebelisitsoe methati e meng ho lokisa maemo a likhiro tsa bacha ba lelekuoeng ho ipapisitsoe le melao. O supile ha ho ka be ho qaliloe pele hoa qosa ‘muso o fetileng mabapi le likonteraka tseo ho thoeng ha li molaong.
