MEKHA E TEKENELA MOLAO OA BOITŠOARO LIKHETHONG
Ka Moipone Makhemeng
E le ho lelekella likhetho tsa puso ea libaka tse tla tšoaroa ka la 29 Loetse 2023, mekha ea lipolotiki e mashome a mararo a metso e ‘meli (32) holima e mashome a mahlano a metso e supileng (57) e bileng teng ho tekenela molao oa boitšoaro maobane hoteleng ea Maseru Avani.
Baeta-pele ba ikanne ho ikobela molao oa boitšoaro tsamaisong ea likhetho tsa Mak’hanselara le Komisi e Ikemetseng ea Likhetho (IEC).
E mong oa lik’homishinara tsa IEC, monghali Tšoeu Petlane, o bontšitse hore kamora ho tekenela molao ona oa boitšoaro, ke boikarabello ba bapolotiki ka kopanelo le Komisi ho khothaletsa sechaba hore se khethe le ho bona hore litaba tse amanang le boitšoaro li etsoa pepeneneng.
Monghali Ts’oeu Petlane, e mong oa lik’homishinara tsa IEC
A re tsohle li lokela ho itšetleha holim’a seo ba se utloisisang hore ke litšiea tse tlamang boitšoaro ba sechaba, ho busa le ho tataisa.
O supile hore Komisi e na le mafapha a mabeli a ho tšehetsa mokhahlelo o joalo. “Ho na le sehlopha seo re tla se bitsa balebelli kapa balisa ba molao ona e leng Code of Conduct Monitors. Bao ke mahlo le litsebe tsa IEC. Le tla lemoha hore hajoale ho fahlanoa ka marole ke bapolotiki ha ba tseka menoana ea sechaba.” Petlane oa hlalosa.
Lebitsong la bapolotiki, moetapele oa Lesotho Workers Party, mofumahali Rosa Lenea o bontšitse baetapele ba se na bothata holim’a litaba tse tšohliloeng.
“Ha ke nahane eka baeta-pele ba na le litaba tse ngata kamor’a hore o re tekele ka litaba tseo u supang hore ke lebofe leo re il’o le sebelisa likhethong tsa puso ea libaka. Ha re na mantsoe a mangata ‘m’e ho hoholo ke hore feela re itlameng kajeno ka litaba tsohle tse qetang ho behoa. Seo ke se boneng ke ho re ha ho na moetapele ea hananang le tsona.” Lenea o rialo.
Ho feta mona, moetapele oa Democratic Congress (DC), mohlomphehi Mathibeli Mokhothu, o itse o leboha haholo ha ba ntse ba kopana khafetsa ho shebisana tsela ea tšebetso. Mokhothu o re Basotho ba tla itlhahisetsa baetapele ba sona metseng le metsaneng ka likhetho.
Boha litšoantšo tsa tšebeletso:
Monghali Tlohelang Aumane, motlatsi oa moetapele oa SR
Monghali Metsing oa LCD o ts'etleha puo
Monghali Metsing oa tekena
Monghali Aumane oa SR o'a tekena
Mofumahali Rosa Lenea oa Worker's Party
Monghal iMathibeli Mokhothu oa Democratic Congress
Baeta-pele la lipolotiki
Baetapele ba mekha ea lipolotiki ba tekenneng
Baeta-pele ba lipolotiki
Ho feta mona, o bontšitse a thoholetsa komisi le ‘muso hore ebe komisi e tla tsoa matlong a batho e-be le motlotloane oa eona. O ile a boela a supa hore ba boetse ho na le tlhokahalo ea hore Komisi e ikemele ka botlalo.
“Boikemelo ba IEC ha bo felle feela mono hore ba tsoe matlong a batho ebe ba ik’hahela liofisi. Taba eno e boetse e ea tabeng ea boikemelo ba chelete.
“Ba ka paramenteng le oona ‘muso ka kotloloho, a ke le etseng hore Komisi ena e ikemele e tlohe tlas’a lehafi la ‘muso. IEC should account directly to Parliament. Le ka chelete ha ho etsoa likhakanyo, molao o tle o bokelle chelete ea Komisi hobane IEC le kamora likhetho mosebetsi oa eona o ntse o tsoela-pele.” Mokhothu o fera joalo.
