MEC E HANELA MOSALI HO EMELA LIKHETHO HOBANE KE LESOFE
Ka moqolotsi oa rona
La 4 Phato 2023
Setho sa mokha oa lipolotiki Movement for Economic Change (MEC), Matšeliso Monyane, o hlahletse nyeoe e potlakileng Lekhotleng le Phahameng o tseka hore MEC e thibeloe ho mo khetholla ho emela likhetho tsa khekhethane hobane e le lesofe.
Lipampiring tsa lekhotla, Monyane o hlalosa MEC e hanne ho ‘meha lenaneng la khekhethane likhethong tsa puso ea libaka tse tla tšoaroa ka la 29 Loetse 2023. Nyeoeng ena molli o qosa komiti e kholo ea MEC, mokha oa MEC, le komisi e Ikemetseng ea Likhetho ea IEC.
Babuelli ba hae ba feme ea maqoetha ea K.D Mabudu ba kopa lekhotla ho nka nyeoe ena e potlakile ka ho mameloa kapele ka moo lekhotla le ka khonang ka teng.
Har’a lithapeli, tsa molli o batla hore qeto ea komiti e kholo ea MEC ho hlakola khekhethane likhethong tsa mak’hanselara lekaleng la Monyane e nkoe e le ka thoko ho molao ‘me e lahleloe matjoing. Ho feta mona, molli o batla hore a behoe ka holimo-limo lenaneng la khekhethane lebatooeng la Thabana-Morena.
“Moqosuoa oa pele a thibeloe ke lekhotla ho khetholla molli ka lebaka la ‘mala oa letlalo la hae.” Maqoetha a molli a ngotse thapeli joalo.
Bopaking ba hae lipampiring tsa lekhotla, Monyane o re ke setho se matla sa MEC ‘me o re o ile a emela likhetho tsa mak’hanselara mokhahlelong oa mathomo Ha Ramathaleha lekaleng la Monyane ha ho lokisetsoa ho fumana mokhothaletsuoa.
“Ke mosali ea lulang Thabana-Morena, Mafeteng ‘me ke rata ho hlakisa hore ke lesofe empa lebala la ka le entse hore ke khetholloe ka litsela tse ngata ke litho tsa MEC tse maemong a holimo kahar’a mokha.
“Ka la 8 Phupu 2023, ke ile ka kena leetong la ho kenela mojao oa likhetho tsa mak’hanselara lekhotlaneng la Ramathaleha lekaleng la Monyane moo e leng haeso.
“Ke lumela hore ke na le litokelo tsohle ho emela likhetho mono. Kamora likhetho tsa mathomo ke ile ka hlaha bobeling ha boemong ba pele e bile e mong Mohapi Mohapi ea ileng a fumana livoutu tse 79 ha ‘na ke mo latela ka tse 77. Ea ntatelang o fumane tse 30 feela.” Monyane o beha joalo lipampiring tsa lekhotla.
Ho ea ka lipehelo tsa MEC, mananeng a khekhethane basali ba lokela ho fuoa monyetla haholo ba fumaneng livoutu tse ngatanyana.
“Ke ile ka tsebisa MEC hore ke batla ho ba lenaneng la khekhethane. Ke ne ke lumela hore MEC e tla mpeha kaholimo-limo lenaneng la khekhethane ho latela leano la eona la ho sheba basali haholo khekhethaneng e le ho ba fa monyetla.
“Ho fihlela kajeno, MEC e iphapanyelitse taba ena leha molao oa eona oa motheo temaneng ea 3.2 o bolela. Seo litho tsa komiti e kholo li se buileng ke hore li ke ke tsa mpeha lenaneng la khekhethane hobane ke lesofe.
“Sechaba sa Ha Monyane se lekile ho hatella komiti ho ikobela molao oo empa komiti ea lebatooa ha e lokela ho tla ka tharollo e nkile qeto ea ho hlakola lenane la khekhethane lekhotlaneng la Ramathaleha.” Monyane o fera litaba joalo.
