MATICHERE A HOANTELA MATEKANE LABORARO
Ka moqolotsi oa rona
La 11 Pulungoana 2023
Mekhatlo e meraro ea matichere, Lesotho Association of Teachers (LAT), Lesotho Teachers’ Trade Union (LTTU) le Lesotho Principals’ Association (LESPA) e fuoe tumello ke sepolesa ho ts’oara mokoloko oa nyatso moo e tla nehelana ka lengolo la litletlebo ho tona-kholo Sam Matekane ka la 15 Pulungoana 2023.
Mekhatlo e ngolletse tona-kholo ho e tsebisa hore ka la 15 Pulungoana 2023, matichere a tla ts’oara mokoloko ho tlisa lengolo la litletlebo ho eena.
“Kamora ho hloleha nako e telele ho lula tafoleng ea lipuisano le Letona le Thuto le Koetliso ka sepheo sa ho seka-seka ho kenngoa ts’ebetsong hoa litumellano tse neng li fihleloe ke mekhatlo ea matichere le ‘muso, re se re ts’epetse ho uena feela.” Lengolo la mekhatlo le ngotsoeng ka la 6 Pulungoana 2023 le baleha joalo.
Ho ea ka polomiti ea sepolesa, mohoanto o tla thakhoha Sethaleng sa Mopapa ka letsatsi le boletsoeng ka 10am. O tla harolohela Sefikeng sa Moshoeshoe, ho tsamauoa ka tsela ea Katlehong. Mokoloko o lebeletsoe ho qhalana ka 3pm.
Har’a lillo tse tlalehoang li tla kenella lengolong la litletlebo ke meputso ea matichere esale e farela ka khoeli ea Loetse 2019. Mekoloto ea lilemo-lemo (arrears) ea matichere. Taba e ‘ngoe ke pharela mabapi le khiro ea mesuoe-hlooho likolong. Ho boetse ho kenella mathata a lenane thuto le lecha le tse ling.
