MATEKANE O TSOSOLOSA LIPUISANO KHOEBONG
Ka Moipone Makhemeng
La 18 Hlakola 2024
‘Muso oa Lesotho o tšoenyehile ke boemo bo tetemang ba moruo kamora seoa sa Covid-19 le bothata bo tjametseng likete-kete tsa Basotho ba lahlehetsoeng ke mesebetsi lifemeng. E le mekutu le maoa a ‘muso ho hlasimolla kholo ea moruo, tona-kholo Sam Matekane o thakhotse tsosoloso ea Sethala sa Lipuisano sa Likhoebo tse Ikemetseng le Sechaba (Lesotho Public Private Dialogue – PPD) ka la 14 Hlakola 2024 mane Victory Hall, Maseru.
Matekane ha a teka puo o itse taba-kholo ea tsosoloso ea sethala sa lipuisano ke ho seka-seka maemo a sithabetsang a botseteli Lesotho. Ho kenyelletsa le batseteli ba ntseng ba ikhula, maemo a sithabetsang a khoebo ka kakaretso hammoho le mefokolo ea ‘muso malebana le ho thusetsa khoebong e fofotsang. A supa hore eena ka seqo o tla ithukhubetsa ka matla ho seka-seka bothata bona le ba amehang.
Mofumahali Teboho ‘Mokela, Mongoli oa ‘Muso, ke eena ea neng a tsamaisa ts’ebeletso
Leha ho le joalo, Matekane o lebohile metsoalle ea machaba ea Lesotho ka ho ema le bona. “Ke rata ho fetisa liteboho tsa ka ho metsoalle ea rona ntlafatsong ea moruo joaloka African Development Bank, World Bank le Millennium Challenge Account (MCA). Metsoalle ena e re thusitse ho rala le ho ntšetsa-pele moralo ona.” Matekane o rialo a re metsoalle ena esale e ema le bona linakong tse thata.
Matekane o tobokelitse qholotso e kholo ea ho putlama hoa moruo e le litholoana tse bohla tsa seoa sa Covid-19 seo a reng se bakile hore Basotho ba bangata ba lahleheloe ke mosebetsi lifemeng moo likhoebo tse ling li bileng tsa koaloa. A re ho bohlokoa ho holisa lefapha la khoebo lehlakoreng la lifeme.
“Ho fihlela sena, re tlameha ho lokisa maemo a botseteli a nyotobetseng. Lipalo-palo tsa morao li supa Lesotho le le tlaase haholo ntlheng ea botseteli. Mohlala, Lesotho le hlaha tlaase haholo litsing tse latelang tsa bolisa ba litaba tsa moruo lefatšeng; Transparency International Corruption Index, Heritage Foundation/Wall Street Journal le Fraser Institute’s Economic Freedom Index rankings.” O rialo.
O tsoela-pele: “Litsi tsa machaba tse lisitseng maemo a lichelete a linaha li tlaleha ha maemo a naha ea rona a sepolotiki a na le seabo se seholo maemong a mabe a moruo. Sena se fetoha sekhoqetsane le ho nyahamisa batseteli ho tla Lesotho.” Ke Matekane a bile a ipiletsa hore ho bohlokoa hore Lesotho le be maemong a khotsofatsang hore le tle le hohele batseteli.
Ntlheng ea botseteli bo ntseng bo qepha, Matekane o itse seo ke letšoao la ho hloka tšepo hoa batseteli moruong oa Lesotho: “Re tlameha ho eketsa botseteli ba lehae le ba machaba kahara moruo oa rona. Ho etsa joalo, ‘muso o lokela ho sebetsa ‘moho le litsi tse ikemetseng ho tlisa moruo o tsitsitseng ka ho kenya tšebetsong maano a hohelang botseteli ka tsela ea ho phahamisa tšebelisano ea sechaba le litsi tse ikemetseng e le ho hohela botseteli mafapheng a temo, matla, tlhahiso lifemeng, bohahlaoli le theknoloji.”
E le ho pharalatsa le ho batalatsa mabala khoebong, Matekane o hlalositse bohlokoa ba boqapi le thehong ea mesebetsi. A re sena se ka etsoa ka ho kenyelletsa maano a ntlafalitsoeng kholisong ea moruo. A thatiselletsa ka hore ho bohlokoa ho thusa bahoebi ba banyenyane ho fumana mekitlane libankeng ho ba thusa ho qala le ho holisa likhoebo tsa bona.
“Bahoebi ba rona ba lokela ho hlomelloa ka litsebo tsa khoebo ‘me seo ba ka se fumana ha ba ka fuoa thuto ea khoebo le ho bona hore ba buleloa limmaraka. Mona ke bua haholo ka ‘maraka linaheng tse kantle haholo-holo ho batho ba batlang ho kena khoebong. Seabo sa ‘muso se bohlokoa haholo ntlafatsong ea moruo.
Matekane o ferile puo ka ho supa mefokolo ea ‘muso litabeng tsa kholiso ea moruo empa a toboketsa bohlokoa ba hore ‘muso o tšoarane ka matsoho le mafapha ‘ohle kholisong ea moruo.
Ho feta mona, litsebi tsa moruo ka ho fapana li ile tsa tšoaela ka menyabuketso e lokelang ho nkoa katlehisong ea moruo. Litsebi tseo e bile; Monghali Thabo Qhesi ho tsoa Private Sector Foundation Lesotho (PSLF), monghali Fako Hakane oa Lesotho Chamber of Commerce and Industry (LCCI), mofumahali Mannana Phalatse Mookameli oa Millennium Challenge Account (MCA), monghali Chaba Mokuku, ho tsoa ho Competitiveness and Financial Inclusion (CAFI) le Adv. Molise Ramaili oa Lesotho National Development Corporation (LNDC). Bona ba rapalalitse liqholotso le maoa a litharollo.
E ‘ngoe ea liqholotso lefapheng la tlhahiso eo monghali Qhesi a li hlalositseng puong ea hae ke litsebo tsa mosebetsi. O boletse hore Lesotho ha le na litsebo tse khethehileng tsa mosebetsi. A lla ka litšenyehelo tse phahameng tsa tlhahiso. Mona ke moo a ileng a bolela hore ha ho na libaka tsa meralo ka mabalane kahona ba lokela ho kenyelletsa mak’hanselara ho ba fa libaka.
Qhesi o boetse a bontša hape litšenyehelo tse boima tse kang ho kenngoa hoa motlakase ha ba fumane sebaka e le mohlala. Ho feta moo, o buile ka thepa e tsoelang ka ntle ho naha. A meketsa ka hore ba sebelisa leliboho la Durban feela ‘me seo se senya khoebo ea bona kaha thepa e lieha ho fihla moo e eang.
