MASOLE A QOSOANG KA LIPOLAO A LOKOLLOA KA BEILE
Ka Moipone Makhemeng
La 24 Pherekhong 2024
Moahloli oa Lekhotla le Phahameng, Maseru, Polo Banyane kajeno o fane ka beile ea M5000 ho masole a mane ho a mahlano a qosoang ka polao ea baahi ba bararo ba Mafeteng e etsahetseng ka selemo sa 2012.
Baqosuoa ke Litekanyo Nyakane, Khauhelo Makoae, Tsepo Thakeli, Sebilo Sebilo le Thebe Ts’epe bao ho thoeng ba ile ba thunya le ho bolaea Thabang Mosole, Monyane Matsie le Pakiso Letatabe, Ha Motanyane Mafeteng ka la 07 Ts’itoe 2012.
Beile e fanoe tlasa lipehelo tse latelang; moqosuoa ka mong o tlameha ho itefella M5000, hammoho le ho beha paneng M25 000.
Baqosuoa ba laetsoe ho nehelana ka litokomane tsa bona tsa ho eta. Ba boetse ba laeloa ho beha motho paneng e leng letsoalloa la Lesotho ea nang le litokomane tse mo pakang.
Ba laetsoe ho itlaleha ntlo-kholo ea sepolesa sa Maseru beke e ‘ngoe le e ‘ngoe lipakeng tsa hora ea borobeli (8am) ho isa ho hora ea bone mantsiboea (4pm).
Ntlha ea ho qetela ebile hore ba se ke be ba beha leeto la bona Mafeteng, Ha Lepolesa.
Moahloli Banyane ha a tšetleha mabaka a beile o itse ha se toka hore baqosuoa ba lutse teronkong ka lebaka la bochochisi bo hulanyang maoto hore nyeoe e tsoela-pele e fele. A re ha se lekhetlo la pele a tlameha ho chechisa nyeoe ka lebaka la bosieo ba lipaki.
Ho sa le joalo, moqosuoa ea ka sehloohong Litekanyo Nyakane eena o na sa kopa beile, kahona o tla tsoa a le chankaneng.
