MASOLE A MANG A LOKOLLOA KA BEILE
Ka Moipone Makhemeng
La 26 Tlhakubele 2024
Baqosuoa ba babeli ho ba tšeletseng nyeoeng ea teko ea ho liha ‘muso ka selemo sa 2014, hammoho le qoso ea polao ea molaoli oa mehleng oa sesole Lieutenant General Maaparankoe Mahao, Lance Corporal Motloheloa Ntsane le Lance Corporal Leutsoa Motsieloa ba hlahile Lekhotleng le Phahameng Maseru maobane ho tla mamela lipehelo tsa beile eo ba e filoeng ka la 22 Tlhakubele monongoaha.
Bo- Motsieloa ba qosoa ‘moho le Retired Lieutenant General Tlali Kamoli, Captain Litekanyo Nyakane, Mothetjoa Metsing le Selibe Mochoboroane. Nyeoe e mametsoe ke moahloli ‘Maliepollo Makhetha ha akhente ea mofapa-hlooho e le Adv. Rethabile Setlojoane.
Setlojoane o hlokomelisitse lekhotla hore le se ee le khongoana holimo hore baqosuoa ba ka se balehe hobane feela e le masole. Kahona o ile a sisinya hore lekhotla le ba pitle ka beile ea M10 000 motho ka mong le ho fana ka tiisetso ea M150 000 kaha ba tobane le liqoso tse boima.
Ho sa le joalo, Adv. Lepeli Molapo lebitsong la ‘muelloa oa hae o ile a itela ho lekhotla hore beile ea M10,000 e boima haholo ho latela moputso oa baqosuoa o fokolang oo ba o fumanang oa khoeli oo a o hakanyelitseng ho M7,000 ka khoeli.
A boela a supa hore M150 000 eo mofapa-hlooho o e behang hore baqosuoa ba e behe paneng ha e hlokahale kaha bao e le litho tsa sesole tse tlasa tšireletso ‘me ha ho ka moo ba ka balehang ka teng.
Molapo o ile a etsa kopo ea hore ebang lekhotla le ka fumana ho hlokahala hore ba behe ho hong paneng bonyane e theohele ho M75 000.
Moahloli ‘Maliepollo Makhetha [Image Supplied]
Ho sa le joalo, Adv. Napo Mafaesa o ile a lumellana le oa mphato oa hae hore baqosuoa bonyane ba itefelle beile ea M5000 ha lekhotla le lumela.
“Maikutlo a rona ke hore maemo a sisintsoeng ke mofapa-hlooho a boima haholo ‘me a tlola lipehelo tsa temana ea 107 ea molao oa tsamaiso ea linyeoe tsa litlolo tsa molao le bopaki.
“Mohlomphehi karolo ea pele ea temana ea 107 e re chelete ea beile e lokela ho nkuoa ke lekhotla le hlomphehang ka botlalo. Nomoro ea bobeli eona e re ha ho motho ea lokelang ho belesoa beile e boima.” Adv. Mafaesa o tšetleha joalo.
Adv. Rethabile Setlojoane [Image Supplied]
Kamora lingangisano tsa maqoetha, moahloli Makhetha o ile a etsa qeto; a laela hore baqosuoa ba lefe beile ea M10,000 motho ka mong, le ho beha paneng M70,000 le hore ba itlalehe sepoleseng sa sesole beke le beke. Ho nehelana ka lipasa tsa bona tse nakong ho sepolesa ‘me ba tla etsa kopo ea ho li lokolleloa tlasa mabaka.
Nyeoe e tla tsoela-pele ka la 22 ‘Mesa 2024 ho isa la 26 ‘Mesa 2024.
Ke mokhahlelo oa bobeli o lokolloang ka beile oa masole ao esale a tšoaroa ka 2017 kaha ka la 24 Pherekhong 2024, moahloli Polo Banyane o ile a lokolla masole a latelang ka beile ea M5000 le peheletso ea M25 000; Khauhelo Makoae, Tšepo Thakeli, Sebilo Sebilo le Thebe Tšepe.
