MARABELE A FETOLA MAOA A NTOA, MOZAMBIQUE
Leihlo la Basotho News
La 8 ‘Mesa 2023
Ho ea ka tlaleho ea United Nations Security Council ea Hlakola monongoaha, ke marabele a ka bang 280 a ntseng a solla le ho hlorisa sechaba porofinsing ea Cabo Delgado, Mozamique.
Raporoto ea beke le beke ea mokhatlo o lisitseng ntoa o bitsoang Cabo Ligado, e re seterekeng sa Nangade moo masole a Lesotho le Tanzania a lisitseng maemo, marabele a tlalehoa a ntse a hlahlathela le ho baleha masole ‘me ho tlalehoa a qetetsoe ho bonoa motseng oa Litingina libeke tsa ho feta ‘me litlaleho tsa lipolao tsa batho li sa emisitse seterekeng sena.
Marabele a Mozambique [Photo Supplied]
Ho feta mona, likhukhuni tsena li tlalehoa li fetotse maoa a ntoa kaha selemong sena baeka ba batla ho hapa lipelo tsa batho ka ho iketsa metsoalle ea sechaba metseng moo ba atisang ho fihla ka khotso; ba reke lijo le thepa e ‘ngoe ba nt’o ikhutlella liahelong tsa bona merung.
Sena se pakahatsoa ke hore ka la 25 Tlhakubele 2023, sehlopha sa marabele se ile sa fihla metseng ea Luchete, Mocímboa da Praia le Pangane, Macomia. Lithena li ile tsa fihla tsa tiisetsa sechaba hore li tlile ka khotso; tsa nt’o ithekela lijo tsa ikela ka khotso.
Leha ho le joalo, lihlopha tsa marabele li bonoe li solla haufi le meru ea Quiterajo, Macomia (moo masole a Afrika Boroa a nang le motebo) hape batšoasi-ba-litlhapi ba re ba bona marabele nako eohle a ferella mabopong a leoatle.
Tonakholo le Molaoli oa Sesole
Ho boetse ho bonoe marabele haufi le metse ea Limala, Marere le Calugo ka boroa ho Mocímboa da Praia. Mona ha ba hlasela batho empa ba tlalehoa hape ba atisa ho roma batho ho ea mabenkeleng hore ba ba rekele lijo. Eka ba hanang ho rongoa, baeka ba ba tšosa ka hore ba tla ba khabela.
Ka lehlakoreng le leng, ho bile le ho thunyana lipakeng tsa masole a Southern African Development Community (SADC) Mission in Mozambique (SAMIM) moo ho e-s’o hlake hore na litemalo li bile joang mahlakore ka bobeli seterekeng sa Macomia.
Ka la 27 Tlhakubele 2023, Rwanda Defence Force (RDF) e ile ea nehelana ka banna ba 20 ba ileng ba hapuoa ‘me eka bao ke marabele.
Ka kakaretso tšebetso ea masole e bonahala e na le katleho kaha litlhaselo le lipolao tsa batho kapa masole li fokotsehile morao tjena.
