MACHESETSA O NYA MATSETE
Ka motlalehi oa rona
La 4 Phuptjane 2023
Litaba tsa tšireletso ea naha ea Lesotho li tlalehoa li le tsietsing ‘me li se bile li mathetse makhotleng a molao moo tona-kholo Sam Matekane a hlalosoang a sebelisoa ho loana lintoa tseo a sa li tsebeng.
Litaba tsena li qalile ha tona-kholo Sam Matekane ka letona ofising ea hae, Limpho Tau a tekenela lengolo bakeng sa tona-kholo ho lumella mautloela ho tšoara lifono tsa moetapele oa Basotho National Party (BNP), Machesetsa Mofomobe ka le reng o nkha lefotha polaong ea Ralikonelo Joki. Lebaka le leng ke hore hlooho ea mautloela, Pheello Ralenkoane eo e leng setho sa BNP ebile a kile a emela likhetho tlas’a BNP, o qosa Machesetsa ka hore o na le nyatsi ea leutloela, Ithabeleng Pitso.
Ralenkoane o supa hore Ithabeleng o lula a lutlisa litaba tse hlokolosi tsa boutloela ka ho li fa monghali Mofomobe. O re sena se beha tšireletso ea naha tlokotsing.
Litaba tsena li hlahella lipampiring tsa lekhotla moo Mofomobe a phephetsang teko ea tšoaro ea lifono tsa hae. Monghali Ralenkoane o ngotse mokhoepha oa lengolo (affidafit) moo a tšetlehang mabaka ao a reng Machesetsa o tlameha ho fana ka lifono tsa hae ho mautloela.
Monghali Pheello Ralenkoane – Hlooho ea Mautloela
Ralenkoane o boetse o qhoaelletse lifoto tsa melaetsa ea WhatsApp tse bontšang hore Pitso o ne a atisa ho fana ka leseli la mautloela ho Mofomobe. Lifoto tse ling tseo Ralenkoane a li qhoaelletseng ke tsa mapona-pona a amahanngoang le Mofomobe ao a neng a a romeletse Pitso.
Leha ho le joalo, Mofomobe o tsitlalla hore Ralenkane o bua mashano ka eena. O re mookameli oa mautloela o ntse a kenya tona-kholo kahara litšila feela molemong oa ho loana lintoa tsa hae.
O supa hore Ralenkoane o habile ho tla nka boetapele ba mokha oa BNP ka thutsoana-ea-‘mooana.
Moetapele oa BNP o nya matsetse lipampiring tsa lekhotla; o re khale a arolelana leseli la mautloela le Ralenkoane kaha o re ke eena ea entseng hore Ralenkoane a fumane mosebetsi oa ho okamela mautloela.
“Khale ke arolelana melaetsa ea mautloela le eena Ralenkoane feela oa ‘makatsa ha a re ke phoso ha ke arolelana eona melaetsa eno le ofisiri ea hae e boemong bo tlaase (Ithabeleng Pitso).
“O’a lebala motho enoa hore ke eena ea ntsebisitseng Ithabeleng Pitso le mautloela a mang. Ke eena ea ileng a ntsebisa liofisiri tsa mautloela tse akhang ‘Matau Hlalele le Tlaleng Thaele bao a ileng a mpolella hore ke linyatsi tsa hae tsa BNP.” Mofomobe o hlalosa joalo lipampiring tsa lekhotla.
O boetse o re o ne a arolelana leseli la mautloela le basali bao hammoho le Ralenkoane ea neng a bile a tiisa litaba tse joalo. Ramanasi o re Ralenkoane o ile a qabana le Pitso nakong eo ho uoang likhethong tsa boeta-pele ba BNP.
“Qabang ea bona ke eona e bakileng hore a khelose tona-kholo ka ho ‘ngolla lengolo la hore lifono tsa ka li nkuoe ke mautloela. Kajeno Ralenkoane o sebetsa le lequloana la BNP le batlang ho nketola setulong sa boetapele.”
“Motho enoa ke ne ke mo joetse hore o selehe, hoja ha se ka ‘na a ka be a ntse a sokola e le sehoai koana. Ke mo thusitse ho mo ntša bofumeng.
“Ke ‘na ea inotši ea neng a bue le tona-kholo (Moeketsi Majoro) hore a mo hire. Ka nako eno ho na le tšimonyana ea neng a ntse a leka ho e lema Kolo mane ha ke mo founela hore ke mo fumanetse mosebetsi.
“Ke ne ke mo bitsetse ntlong e ‘ngoe moo ke neng ke le ha motsoalle oa ka, eaba Ralenkoane ha a fihla mono, a noa tirinki ea Oros e neng e le ka sehatsetsing kaofela hoba o ne a lapile.” Mohlomphehi Mofomobe o tšetleha litaba tsa hae joalo lipampiring tsa lekhotla. Litaba tsena li tsoa koranteng ea lehae – The Post.
Ho sa le joalo, kajeno Mofomobe ho Facebook o tšositse ka hore o tla lokolla khatiso eo Ralenkoane moo a neng a batla hore mosali e mong a mo tsitsilele likobo.
