LINARE E PHATLALATSA MOKOETLISI E MOCHA
Ka Moipone Makhemeng
La 10 Tlhakubele 2024
Sehlopha sa bolo ea maoto sa Leribe, Linare FC se phatlalalitse monghali Atang Bob Mafoso e le mokoetlisi oa sona e mocha. Sena se hlahelletse ’mokeng oa baqolotsi o neng o tšoeroe maoba, Mahobong, Leribe.
Mafoso o boetse o koetlisa sehlopha sa naha – Likoena ebile o sa tsoa nyahlatsa sehlopha se seholo sa Bantu FC. Mafoso ke e mong oa bakoetlisi ba tsebahalang ka ho sebetsa ka thata papaling ea bolo. O itse o ikemiselitse ho tlisa boemo bo bocha ba thabo ho khutlisetsa sehlopha sena sehlohlolong joaloka pele.
Mookameli oa Linare, Refiloe Maitin o amohela Bob Mafoso e le mokoetlisi
Mafoso o thatisellelitse ka ho re o motlotlo haholo ho ba karolo ea Linare FC le ho tla sebetsa ho fihlela litaba-tabelo tsa eona. O lebohile kamohelo e mofuthu eo a e fuoeng ka ho bontša hore ka lilemo tse leshome tseo e bileng mokoetlisi o ithutile hore na seo se bolelang.
Konteraka ea Mafoso e hlalosoa ke monga eona e le ea nako e telele. Mafoso o nka marapo a bokoetlisi ho Linare kamora hore mokoetlisi Leslie Notsi a siee sehlopha sena mafelong a Pherekhong.
Refiloe Maitin, mookameli oa Linare
Ho ea ka Mookameli oa sehlopha sena, Refiloe Maitin, Mafoso o nkoa e le e mong oa bakoetlisi ba hloahloa kahara naha ‘me ke ka hona ho bileng bonolo ho Linare ho mo fa mosebetsi ona.
H’a bua ‘mokeng ona Maitin o itse; “E se e le nako e telele re ntse re leka ho bua le Coach Bob hore a khutlele lapeng, joalokaha e le Nare, a tle semolao ka hare ho Linare. Ke ka makhetlo a ka bang mabeli re ntse re mo kopa empa re hloleha leha ho le joalo eitse hang hore a fane ka hore o se a siile Bantu, ka sebele re ile ra mo qhautsa le pele a ka tleloa ke menahano e itseng.” Maitin o rialo.
