LINARE E KENA SELEKANENG LE SQO
Ka Moipone Makhemeng
La 22 Tlhakubele 2024
K’hamphani ea liphahlo ea lehae e thehiloeng ka selemo sa 2017, Sqo Clothing Brand, e tlabotse selekane sa tšebetso le sehlopha sa bolo ea maoto sa Leribe – Linare FC. Tšebeletso ena e bile holong ea UNESCO, Maseru maobane.
E mong oa bathehi ba Sqo, monghali Tokelo Mofokeng o hlalositse hore k’hamphani ea habo e shebane haholo le ho hlahisa likepisi, likatiba, likipa, le liphahlo tse ling. A re Sqo ke k’hamphani ea lehae e batlang ho holisa feshene ea Lesotho.
Mofokeng h’a bua ka selekane sa bona o behile mantsoe tjena: “Re phatlalatsa mona hore Sqo Clothing Brand le Linare Football Club li kena selekaneng. This means we are going into a merchandise collaboration, e leng hore we are going to make designs for the fans, and to plan the designs for Linare.” Mofokeng o hlalosa tsa lenyalo la bona le Linare FC empa a supa hore ha ba tlo etsa seaparo sa sehlopha ho bapala ka lebaleng.
Taba-tabelo ea Mofokeng ke hore ba fumane menyetla e meng ea khoebo ho lik’hamphani tse ling tsa lehae kaha ba sa hola khoebong ena. A supa hore kholo ea bona e tla hlahisa mesebetsi ho Basotho ba bang.
Tokelo Mofokeng, e mong oa bathehi ba Sqo
Mofokeng o boletse Sqo e tsebahala kaha e kile ea hapa khau ea lik’hamphani tse ipabotseng tsa lehae tsa liphahlo e neng e tšehelitsoe ke Vodacom Lesotho. A toboketsa hape hore Sqo e na le barati ba bangata. A thatiselletsa hore barati ba bang ba eona ke ba ratang bolo ea maoto ‘me ba leka hore le bao ba ratang lihlahisoa tsa bona ba kenyelletsoe le liaparong tsa bolo.
Ha a tsoela-pele, Mofokeng a re taba ena e tlo tlisa kopano kahare ho sehlopha le ho bathahaselli ba bolo kaha seaparo seo ba se etsang e tla ba sa boemo bo tla ratoa ke bohle ntle le qea-qeo kaha e le sa feshene.
efu Mokaoane, motlatsi oa mopresitente oa Linare FC
O thatisellelitse ka hore morero ke ho kopanya litheko e le ho iponahatsa sechabeng ka mahlokore ka bobeli e leng la lipapali le la moralo oa feshene (fashion design).
Ho ea ka motlatsi oa mopresitente oa Linare FC, monghali Lefu Mokaoane, o itse ba moo ka sepheo sa ho theha selekane sa khoebo le Sqo. O phamisitse thabo ea hae ka lenyalo lena. A hlalosa boithutong ba hae batho boholo ba rata ho ikamahanya le Linare FC e le brand.
‘Mabotle oa Linare o bonts’a seaparo se entsoeng ke Sqo
‘Mokeng ona ho bile hoa hlahisoa kapele ho baqolotsi likipa tse ncha tseo Sqo e li entseng e le teboho ho Linare FC ka kananelo ea ho sebelisana ‘moho.
