LESOLE LE PHETA TABA TSE BOHLOKO
Ka moqolotsi oa rona
La 16 Tlhakubele 2024
Lesole le boemong bo phahameng la Lesotho le phetile masetla-a-libete ka moo mapolesa a ileng a le hlokofatsa ka tsela e hlokang botho.
Brigadier Rapele Mphaki, eo esale a tšoaroa a lula toronkong ho tloha 2017 ka qoso ea polao ea banna ba bararo, Lekhoele Noko, Molise Pakela le Khothatso Makibinyane le linyeoe tse ling. Ho thoe eena le masole a mang ba ile ba fenetha le ho lahlela litopo tsa bao letamong la Mohale. Brig. Mphaki o qosoa le masole ana: Major Pitso Ramoepane, Sergeant Lekhooa Moepi, Captain Mahlehle Moeletsi, Lance Corporal Mahlomola Makhoali, Private Nthatakane Motanyane, Private Motšoane Machai, Private Tieho Tikiso, Private Liphapang Sefako le Private Nemase Faso. Litopo tsa banna bao li ne li inoloe letamong la Mohale ka 2017.
Captain Mahlehle Moeletsi e mong oa baqosuoa le Brig. Rapele Mphaki
Mphaki o ne a fana ka bopaki bekeng ena nyeoeng kahara e ‘ngoe moo ba batlang lekhotla le lahlele matjoing maipolelo a entsoeng ke eena le masole a qosoang le ‘ona ka le reng ba qobelletsoe ke sepolesa ho etsa maipolelo a hore ke bona ba bolaileng banna bao, ba nt’o lahlela litopo tsa bona letamong la Mohale. O re ba entse joalo ba qobelletsoe ke sepolesa e se ka boithaopo.
Ha a phetela moahloli Moroke Mokhesi tsa mohla a tla hlokofatsoa ke mapolesa, Mphaki o re o ile a inehela ntlo-kholo ea sepolesa ka la 20 Loetse 2017 kamora ho eletsoa ke monga hae ea neng a tšoere molepo e le molaoli oa sesole, Major General Lineo Poopa ho etsa joalo.
O re ha a fihla ntlo-kholo ea sepolesa o fihletse ho ACP Ramachaea ea ileng a mo nka a mo isa ho eo e seng e le DCP Moqhibi Likhama hajoale. O re ba ile ba kena le eena lipotsong letšeare kaofela, eaba mantsiboea ho ea bosiu oa hlokofatsoa.
DCP Sera Makharilele
O re ha a tloha mono, DCP Sera Makharilele ea neng a le boemong ba Senior Inspector nakong eo o ile a nehelana ka eena ho sehlopha sa mapolesa a kenyeletsang; Seagent Thamae Thamae, Inspector Beleme Lebajoa ka nako eo, hajoale ke DCP Lebajoa, Lance Sergeant Mohanoe, Lance Sergeant Nkeane, Police Constable Lethoko, Police Constable Seutloali, Police Constable Nthejane le Police Constable Tshabalala.
“Ha re fihla ofising eo, Makharilele o ile a re: ‘Inspector Lebajoa motho eane eo u ntseng o mo batla ke enoa, eaba kamora moo oa tsoa o ntšiea le mapolesa ao.” O bolella lekhotla Brig Mphaki.
Mphaki o re o ile a fuoa setulo eaba Lebajoa o re ho eena, “Re u bitsitse tjena hore u tlo re hlakisetsa ka mafu a batho bane ba bararo bao uena le masole ao o sebetsang le ‘ona le ba fenethileng. Ke ile ka ba bolella ka re; ‘bo-ntate ha ke tsebe letho ka batho bano.’”
MALETSUNYANE 2024
O re bo-Lebajoa ba ile ba halefa haholo, ba re a ba joetse hore na litopo tsa banna bao le ikae, empa eena a ba fetola ka hore ha a tsebe letho. “Ba ile ba re kea bapala ‘me ba halefa haholo eaba ba qalella ho ntsolisa liphahlo tsa ka, ba kharuma ba re kea tseba na litopo tseo li hokae. Ba ile ba re ke rona ba bolaileng banna bano. Ha ba ntse ba ntlhobolisa ba ne ntse ba nthohaka ka mahlapa a tala ba re ke tla ba tseba hantle!” Mphaki o tekela lekhotla.
O re nakong eo o bone lepolesa le leng le nanabela polasitiki e kholo, terata le molamu ka ofising ka mono moo ho bolokoang thepa ea ofisi. “Ba ile ba ntlama ka terata ba re ke kotsame ke behe mangole sefubeng sa ka, ba ntse ba tsoela-pele ho nthohaka ka mahlapa. Ba ile ba nkakasa ba ntšela ka polasetiking eane e kholo.
Mothetjoa Metsing
“Eaba ba mpolella hore mehloli ea bona e ba bolelletse hore re akhetse litopo tsa banna bao ka nokeng ea Mohokare, Hlotse.
Ke moo ba ileng ba qalella ho ntšela ka metsi a batang poo! hloohong. Ka nqena ba ntse ba sotha terata eane eo ba ntlammeng ka eona.” O tsoela-pele.
Ba boetse kamora ho khefutsa ba ileng ba tsoela-pele ho ntlhokofatsa ba re hantle ba boleletsoe hore litopo re li akhetse Letamong la Mohale.
Mphaki o re nakong eo a ntseng a hlokofatsoa, mapolesa a ile a re a etseletse moeta-pele oa Lesotho Congress for Democracy (LCD), Mothetjoa Metsing le motlatsi oa hae Tšeliso Mokhosi hore ho sebelisitsoe likoloi tsa bo-Metsing ho laesha le ho lahlela litopo letamong la Mohale.
Mphaki o re o ile a hana ho etselletsa bo-Metsing eaba batubi ba hae ba tsoela-pele ho mo hlapaola. Khabareng ba ile ba mo fa liaparo tsa hae hore a tene eaba ba mo koalla setokising ’me nako e ne e le kamora hora ea borobong bosiu.
Haesale Mphaki a tšoaroa mohla tsatsi leo hofihlela kajeno kaha linyeoe li ea sutsa ha li lokela ho tsoela-pele.
