LESHOLU LA MPESA TSA BATHO VCL LE AHLOTSOE
Ka motlalehi oa rona
La 26 ’Mesa 2023
Mosebeletsi oa Vodacom Lesotho (VCL) ea neng a sebetsa lebenkeleng le Masianokeng Lifestyle Centre, Sempa Motsieloa (40) monna oa Mosotho oa Ha Leqele, Maseru o hlahile Lekhotleng la ‘Maseterata oa Maseru ka pele ho ’maseterata Thamae Thamae a qosoa ka bomenemene ba bosholu ba chelete ea MPESA, e kaalo ka M277 566 ea basebelisi ba Mpesa eo a ikhapetseng eona ka bomenemene e le chelete e neng e le boliseng ba hae Vodacom.
Moqosuoa o ne a intšetsa chelete ea batho ea MPESA likareteng tse neng li bonahala ho le nako li sa sebetse empa li na le chelete.
Lipatlisiso tsa sepolesa li supa ha a ne a seha likarete tse joalo ebe o iketsetsa linomoro tsa lekunutu ha a qeta a ntše chelete a itjelle eona.
Ho ea ka lengolo la qoso, moqosuoa ka thoko ho molao lipakeng tsa ‘Mesa 2022 le ‘Mesa 2023 o ikhapetse ka bolotsana le morero oa ho utsoa chelete ea Vodacom MPESA e kaalo ka M277 566. Bopaki bo tekiloeng khotla bo supa hore moqosuoa chelete ena o ne a e ntša Spaza Shop se bitsoang Simba moo a neng a na le likamano le beng ba semousu seo.
E mong oa lipaki e bile, Nomlilo Stemmere mosebeletsi oa Vodacom lafapheng la toantšo ea bomenemene ea ileng a nehelana ka bopaki nyeoeng ena. Mofapa-hlooho o bontšitse hape hore ha ho ne ho ka letsetsoa ofisiri e ‘ngoe e kholo Vodacom, Lekhooa Ramokhoro o ne a tla paka hore moqosuoa o ne a se na tokelo ea ho ntša lichelete tsena tsa batho.
Tokomane e bontšang lethathamo la lichelete tseo a li ntšitseng e tekiloeng kapela lekhotla e bontšitse ha li ne li etsoa ka mehala e meraro e fapaneng ea moqosuoa. Bopaki bo supa ha mehala ena e le eona e neng e sebelisoa ho etsa linomoro tsa lekunutu ekasitana le hona ho ntša chelete.
Moqosuoa o ipoletse a le molato ‘me ha a fana ka mabaka a ka bebofatsang kotlo ea hae o hlaloselitse lekhotla hore ke lekhetlo la hae la mantlha a etsa tlolo ea molao. A bontša hape hore o bile le tšebelisano-‘moho le sepolesa. O boetse a hlalosa hore ke eena ea phelisang lelapa la hae ebile o na le bana. Ha a phethela ho ikopela mohau o tšepisitse ho lefa chelete eohle eo a ikhapetseng eona leha sepolesa se supile hore holima M277 566 eo moqosuoa a e utsoitseng ha ho oa fumanoa leha e le sente e ka khutlelang ka mokotleng oa VCL kaha a e buburile kaofela.
’Maseterata o ile a talima mabaka a boletsoeng ke moqosuoa a boela a bontša hore o bile le tšebelisano-‘moho ka hona sena ke sesupo sa tšoabo. Leha ho le joalo lekhotla le bontšitse ha moqosuoa a phoqile mohiri le sechaba sa bareki ka hona o ile a mo ahlola lilemo tse leshome chankaneng kapa ho itefella M10 000. Koranta ha e fumana hore na o theohetse ka toronkong kapa o atlehile ho itefella empa e tla e sala morao.
