LEKHOTLA LE MAMELA BOPAKI POLAONG EA THANDEKILE MOLISANA
Ka Moipone Makhemeng
La 12 Tlhakubele 2024
Banna ba babeli ba Quthing, ‘Matli Motšoane le Molikoe Motšoane ba hlahile lekhotleng le Phahameng Maseru kajeno, ba qosoa ka polao ea Thandekile Molisana e etsahetseng ka la 17 Pherekhong 2017, Quthing. Baqosuoa bobeli ba ipoletse ba se molato. Moqosuoa oa boraro Lehlohonolo Monyeke eena o se a timetse.
Nyeoe e mametsoe ke moahloli Tšeliso Mokoko, ‘me e chochisoa ke Adv. Mokuku ha ‘muelli oa baqosuoa e le Adv. Ntori.
Ho ea ka paki ea pele, Sekonyela Maeke, mohla mofu Molisana a tla bolaoa, o ne a le haufi kapa Sekhutloaneng, Ha Mopeli, Quthing. Paki e boletse hore mohla letsatsi la ketsahalo, eena Thandekile, Seboniswa le Tlohang ba ne ba ile masimong a ntate Makhetha. O bonts’itse hore ha ba tloha masimong ba ile ba ea ha monghali Makhetha ho ea ja. Ke moo ho fihleng hoa bona Thandekile le ba bang ba lebileng shopong ho ea reka koae.
Ha a tsoelapele o bontšitse hore o ile a bona ba sa khutle ke moo a ileng a leba shopong ho ea ba sheba. A re ha a le lebaleng la bolo o ile a bona Seboniswa le Tlohang ba tloha ka tsela ea shopong ba baleha ho leba hae.
“Ke ile ka ba laela hore ba nkemele moo. Ha ke fihla ba ne ba le mali ba shebahala ba khakhathuoe. Ke ile ka ba botsa na e mong o kae, ba re o shoele ho na le banna ba ileng ba ba loants’oa. Ka re ba nkise moo a leng teng eaba ba re ba ea ts’aba kaha le bona ba il’o shoa.” O hlalosa joalo. O tsoetse-pele ho bonts’a hore kamora moo moena oa mofu a ileng a fihla ho eena ‘me ba leba sebakeng sa ketsahalo moo ba ileng ba fumana mofu a rapalletse fats’e ka mpa a le maqeba a mabeli sefahlehong.
“Ke ile ka bona maqeba a mabeli; le leng le ne le le tlhafunelong, le leng phatleng.” O hlalosa joalo a bile a eketsa ka hore a ne a bulehile.
Paki ea bobeli e bile lepolesa la lefokisi, Detective Police Constable Lechooho ea itlhalositseng e bile lefokisi ho tloha ka selemo sa 2010.
Eena o re kamora ho fumana tlaleho ea ketsahalo ea polao ea motho, o ile a leba teng a tsamaea le Lance Sergeant Jasong.
O re ba ile ba fumana mofu a rapalletse fatše a sa sisinyehe. Kamora ho mo hlahloba ba ile ba mo nkela setsing sa kokelo sa Mphaki moo teng a ileng a fetisetsoa sepetlele Quthing kaha maemo a hae a ne a se matle. O hlalosa hore leha ho le joalo, eo o ile a felloa ke bophelo tseleng.
Detective Police Constable Ntšuoe, o re kamora ho siea mofu ‘moshareng oa Lesotho Funeral Services, Quthing, o ile a thakhola lipatlisiso tse ileng tsa mo lebisa ho baqosuoa ba kapele ho lekhotla.
Ho sa le joalo, ‘muelli oa baqosuoa, Adv. Ntori o ile a botsa PC Lechooho hore na ntle ho menyenyetsi feela ea hore baqosuoa ba khakhathile mofu, na ho na le sebetsa seo a se tšoereng e le bopaki. PC Lechooho o bontšitse ho se sebetsa seo a se tšoereng kaha ho ne ho se bobebe ho fumana sebetsa kaha baqosuoa esale ba tsitlalletse hore ‘qha’ ha ba e-s’o etse ketso ea mofuta oo.
Leha ho le joalo, PC Lechooho o bontšitse hore lipatlisiso tsa hae li bile le mapaki a tšoarehang hore a ka tšoara bao ho nehelana ka bona makhotleng a molao e le ho araba matjala a ba tobileng.
Nyeoe e tsoela-pele ‘me baqosuoa ba emetse nyeoe ba le beiling.
