LCE E TS’OARA LIKAPESO
Ka Moipone Makhemeng
La 2 Loetse 2017
Maobane e bile letsatsi le khethehileng, Kolecheng ea Thupelo ea Matichere (Lesotho College of Education – LCE) ha ho ajoa mangolo ho makoloane lekhetlo la mashome a mabeli a metso e robeli (28) sekolo se thehiloe. Thabo le monyaka li ile tsa aparela bongata bo neng bo phuthehile moo.
Dr. James Motlatsi o abela baithuti mangolo
LCE e fana ka mananeo a thuto a botichere a boemo ba Certificate le Diploma. Puo e fananoeng ke Mok’hansiliri oa LCE Dr James Motlatsi o bonts’itse hore ba ne ba ts’oaea letsatsi leo sekolo se ileng sa thehoa ka lona e le ho fana ka thuto ho sechaba sa Basotho. Motlatsi o itse sekolo se ahiloe ka sepheo sa ho nts’etsa-pele thuto hore ba fumaneng molemo oa ho ruteha ba fetisetse thuto le litsebo ho babang.
Kakaretso ea baithuti ba abetsoeng mangolo ke 799. Lethathamo la kabo ea mangolo ka ho fapana e bile joana: Diploma in Education Secondary, 320, Diploma in Education Primary, 369, Diploma in Education Pre-School and Foundation Phase, 37, Diploma in Education (DTEP), 3, le Certificate in Early Childhood Education (CECE), 70.
Dr. Motlatsi o ts’etleha puo: “Sekolo sa Koetliso ea Matichere ke setsi sa rona sa phetoho. Rea tseba hore matichere a hlahisa tse ntlehali lefats’eng leo re phelang ho lona. E ‘ngoe ea litaba tse melomong ea batho honajoale tsamaisong ea rona ea thuto lefats’eng ka bophara haholo-holo Lesotho ke hore re tla qapa maqheka afe ho thusa baithuti ba rona ha ba qeta ho fumana mangolo likolong tsa thuto e phahameng.
“Na re rupela baithuti hore ba ee kantle ho ba bahiruoa feela? Na re ba rupela ho tsoa moo ho lo tsamaisa likhoebo tsa bona le ho fetola lefats’e? Ha re shebeng Cuba mohlala, ke naha e nang le boemo bo phahameng ka ho fetisisa ba ho bala le ho ngola lefats’eng ‘me baithuti ba sebelisa melemo ea bona ea thuto ho fumana menyetla.” Dr. Motlatsi o qholotsa joalo.
Boha lits’oants’o tse ling ka tlaase:
Baithuti oa Lesotho College of Education likapesong tsa 2023
Thato Letuka ea ipabotseng ho feta baithuti ba bang o amohela khau ho tsoa ho Dr. James Motlatsi
Likapeso tsa baithuti Lesotho College of Education
Mokete o ile oa natefisoa ka lithothokiso, mokhibo esita le ‘mino. Ho feta mona, ho bile le baithuti ba hloailoeng e le ba ipabotseng lithutong ka ho fapana empa har’a bona ho na le ea ipabotseng ka ho fetisisa ka ha a ile a amohela limpho tse ‘ne ka kakaretso lithutong ka ho fapana – eena ke Thato Letuka.
Puisanong le eena o li behile ka tsela e latelang;
“Hore ke fihlele tsena kaofela ha ke tsebe hore na ke atlehile joang empa ke ka Molimo feela. Ho lumela ho Molimo, nke nka se re ho bile thata hobane lintho ha li etsoe ke uena li etsoa ke eena. Nke ke ka nka credit ka re ke bohlale ho feta batho bohle ba mona. Ho lumela ho Molimo motho o etsa mosebetsi oa hau ka thata ke eona feela ntho e etsahalang.
Thato Letuka o ipabotse ka likhau tse ngata
“Khau ea pele ke ea ts’ebetso e ntle ka ho fetisisa, lithutong tsa Professional Studies) Physics le Mathematics. Kannete ke utloa ke kokobetse haholo.”
Keletso ea hae ho baithuti ba ntseng ba leka ho tsoela-pele empa ba sa atlehe kaha ho le boima, o bonts’itse hore o na le matla ho lekeng hape. A re nako ea Molimo ke eona e nepahetseng.
Letuka o lihelletse likhala ka hore thupelong ea botichere o tlile ka pitso. O supile a ile LCE a se ntse a na le sekolo se fumanehang St. James moo a rutang lithuto tse hlano tsa mantlha.
