KHABARENG MASOLE KHOTLA KA POLAO EA TANG
Ka Moipone Makhemeng
La 27 Pulungoana 2023
Litho tse peli tsa sesole sa Lesotho, Corporal Tjekane Sebolai (35) oa Butha-Buthe ha morena ‘Mantlobo Ntlobo tlas’a morena Tumane Matela le Private Selone Ratšiu (32) oa Thaba-Chitja ha morena Khoai Matete, Maseru tlas’a morena oa sehlooho Seeiso Bereng Seeiso, ba hlahile Lekhotleng le Phahameng Maseru kajeno ba balloa liqoso tse tharo.
Nyeoe e kapela Moahloli e Moholo Sakoane Sakoane ha mochochisi e le Adv. Motene Rafoneke. ‘Muelli oa baqosuoa ke Adv. Tšabeha.
Qosong ea pele ba qosoa ka ho thunya le ho bolaea e mong Lisebo Tang bosiung ba la 9 Motšeanong 2014, a le haufi le Ha Leqele kapa Ha Matala, Maseru. Qosong ea bobeli ba qosoa ka teko ea polao ea Tšepo Jane ea neng a na le Tang bosiung boo.
Ka lona letsatsi le boletsoeng, qoso ea boraro ke hore ba ile ba thunya le ho senya koloi e neng e qhojoa ke Jane ea moetso oa Toyota Raider D4D, 3.0L ea linomoro-polata tsa M6636.
Liqosong tsena kaofela, baqosuoa ba ipoletse ba se molato.
Ho sa le joalo, Adv. Rafoneke o bontšitse a sa thabisoa ke boipolelo ba baqosuoa ha ba re ha ba na molato. Kahona a beha kapele ho lekhotla hore o tlil’o fana ka mapaki a tšoarehang nyeoeng ena. Ke moo moahloli Sakoane a ileng a laela hore a fane ka kakaretso ea bopaki ba hae.
“Re ikemiselitse ho bitsa mofuputsi ea tlo fana ka bopaki kaha o bile teng sebakeng sa ketsahalo ‘me a bokella bopaki sebakeng sa tlolo ea molao.” Oa hlalosa Rafoneke.
O ile a tsoela-pele ho bontša hore bopaki boo ke pokello ea mophula oa mali (blood samples) a tsoang sebakeng sa ketsahalo, fired cartridge cases, 6 bullet jackets le 3 dead bullets. O bontšitse hape hore ‘matli oa nyeoe o ile a boela a etsa tšalo-morao ‘me a fumana koloi sebakeng se seng moo ho neng ho ntse ho ahoa ntlo haufi le moo Tang le Jane ba ileng ba thunyetsoa. Koloi e fumanoe e le masoba-soba a likulo, a boela a bokella bullet jackets le fired cartridge tse ling tse tharo.
“Hape re tla hlahisa merathatha (rifles) e ‘meli e ileng ea nehelanoa sepoleseng ke sesole. Tseo ke li-rifle tsa AK47 tsa linomoro tsa E1740 le 3P0492.
“Re tla boela re bitse bopaki ba Lieutenant Limo eo e itseng ha a utloa molumo oa sethunya a ileng a ea sebakeng sa ketsahalo ka boemo ba hae e le moahi oa Ha Leqele ebile e le lesole.” Adv. Rafoneke o tsoela-pele. Ho feta mona, o ile a supa hara ba bang ba tla bitsoa ho fana ka bopaki e tla ba Lieutenant Moeletsi eo e neng e le mookameli oa baqosuoa letsatsing le boletsoeng.
“Re tla boetse re bitse Tšepo Jane ea neng a qhoba koloi e ileng ea thunngoa hammoho le monga koloi eo – Lehlohonolo Lesala. Lepolesa Nkhabu le eena o tla fana ka bopaki kaha a entse liteko lithunyeng tse belaelloang ka ho sebelisoa polaong ena. Mapolesa a mang, Masupha e leng ‘matli oa nyeoe le Supt. Koro le bona ba tla fana ka bopaki.” O rialo Rafoneke.
Nyeoe e tla tsoela-pele hosane kaha kajeno moahloli Sakoane a laetse hore liakhente li il’o ngola fatše tseo li lumellaneng ka tsona esita le ho fa mochochisi monyetla oa ho fa lekhotla lethathamo la bopaki ba hae.
Babali ba tla hopola hore kamora lefu la Tang, bookameli ba sesole bo ne bo nke boikarabelo ba ho boloka mofu ekasitana le ho ahela lelapa le oeleng ka phatla ntlo.
