HOLOMO O NEHELANA KA MARAPO HOSANE
Ka Moipone Makhemeng
La 28 Hlakola 2024
Mookameli oa sepolesa ea behileng meja fatše ka la 23 Hlakola 2024, Monghali Holomo Molibeli, o tla nehelana ka marapo a bookameli ho DCP Dr. Mahlape Morai hosane ka hora ea borobong mapatlelong a Koleche ea Koetliso ea Mapolesa (Police Training College- PTC).
Phatlalatso ena e entsoe ke letona ofising ea Tona-Kholo, Limpho Tau kajeno. Letona le boletse hore Molibeli o behile meja fatše hobane nako ea hae ea ho ea phomolong e fihlile kaha a fihletse lilemo tse 55 tseo mapolesa a eang phomolong ha a li fihletse. Tau a boela a supa hore ea tlang ho amohela lesokoana la bookameli Dr. Morai, o tla tšoara mokobobo likhoeli tse tharo feela.
Limpho Tau, letona ofising ea tona-kholo
“Compol ha a lelekoa, ha a suthumetsoa. Dr. Morai esale a le teng kahare ho sepolesa ‘me ‘muso o lumela hore o tla tseba ho tsoa le tsona boikarabellong bona bo bokana-kana boo a bo fuoeng.” Ho hlalosa Tau.
Ho feta mona, Tau o itse sepheo seo sepolesa se tlil’o tšoara mokete oa neheletsano ea lesokoana la bookameli, ke ho fetola tsela eo litaba li neng li tsamaea ka teng phetohong ea bookameli ba sepolesa linakong tse fetileng. O tehile mohlala hore linakong tsa ho feta, motho o ne a tsoa kahara ofisi tlas’a maemo a sa tsitsang joaloka ho lelekoa hara tse ling.
“Kajeno ‘muso oa Lesotho o rata hore o ke o fetole taba eo; ho ke ho be le neheletsano e le teko ea hore sepolesa se tsoe tlasa maemo a neng a hlobaetsa haholo-holo a ho hahlameloa ke lipolotiki.” Tau o phethela joalo.
Holomo Molibeli, o tla fana ka lesokoana la bookameli ho Dr. Mahlape Morai
Ho sa le joalo, ea behang meja fatše, Monghali Molibeli ha a akhela molangoana o tobokelitse hore beke e fetileng o ne a qeta lilemo tse mashome a mahlano a metso e mehlano (55). A bontša hore ke eona nako eo bona e le mapolesa ba eang phomolong ka eona.
“Taba ena e ea nthabisa, hoba ke lekhetlo la pele nalaneng ea sepolesa sa Lesotho, motho u fumana u ba karolo ea pale e ngoloang bocha hore ha u tsoa ofising ebe bo-‘m’e le bo-ntate ba baqolotsi ba litaba le batlalehi ba bitsoa ka tsela ena hore joale oa tsoa ebile o nehelana ka lesokoana.” Molibeli o tšoaela joalo.
Dr. Mahlape Morai o tla ts’oara mokobobo nako likhoeli tse tharo
Ho feta mona, o itse taba ena e supa puso ea sechaba ka sechaba e tsitsitseng ‘me a lebohela ‘muso oa Lesotho ho fihlela boemo bona kaha taba eo e se bonolo.
Ho li phethela, ea tlang ho amohela marapo hosane, Dr. Morai o itse h’a na mantsoe a mangata litaba boholo li tla phethahala hosane empa a leboha ‘muso ka ho mo tšepela boemo boo a bo fuoang ba nakoana.
“Ke lebohe haholo hore ebe ke fumane phahamiso ena ea nakoana. Ke iphumana ke tlotlehile haholo ‘me kannete kea leboha.” Ao ke mantsoe a Dr. Morai.
