FRAZER O TABANYA ‘MUSO OA LESOTHO KA NYEOE
Leihlo la Basotho
La 13 Pherekhong 2024
Lekhotla le Phahameng Afrika Boroa le ahloletse k’hamphani ea Frazer Solar GmbH (FSG) ka ho lahlela matjoing nyeoe ea ‘muso oa Lesotho moo o neng o hana ho ts’elisa k’hamphani eo chelete eo monamoli a ileng a laela hore Frazer a e lefshoe kamor’a ho hloleha ho phethahatsa litumellano.
Kahlolo e latela hore ‘muso oa Lesotho o laeloe ke monamoli oa lekhotla la Afrika Boroa ho lefa k’hamphani ea matla ea Fraser Solar lits’enyehelo kamora ho koenehela tumellano. Ka Loetse 2028, Frazer Solar GmbH (FSG) e ile ea tekena tumellano ea ho fana ka lits’ebeletso tsa motlakase oa letsatsi ho ‘muso oa Lesotho.
Khang ea Frazer ke hore tumellano e ile ea hlohonolofatsoa ke tona-kholo Tom Thabane le letona la lichelete ka nako eo, Dr. Moeketsi Majoro. Hamorao litaba li ile tsa hlaba tlou ha ‘muso oa Lesotho o bonahala o hlanohela tumellano eo ka le reng e entsoe ka thoko ho molao.
Litabeng tsena ho ile hoa tlola lebitso la letona la mehleng ofising ea tona-kholo, Temeki Ts’olo hore ke eena ea ileng a tekenela tumellano ea ‘muso oa Lesotho le Frazer ka thoko ho molao – empa eena o itatola bosehla.
Frazer Solar e ile ea nka likhato tsa molao ka 2020 lekhotleng la bonamoli Afrika Boroa. Monamoli o ile a laela hore ‘muso oa Lesotho o lefe Frazer €50 million e kentseng litsoala.
‘Muso oa Lesotho o ile oa nka boipiletso Lekhotleng le Phahameng Afrika Boroa mona moo o hlotsoeng ke nyeoe. Lekhotla le laetse hore ‘muso oa lesotho o lefe Frazer (US $64 million, M1.2 billion). Chelete ena e kenyeletsa litsoala.
