SEBOHOLI SE QOSOA KA MANGOLO A LEFOFO
Ka Moipone Makhemeng
La 24 Phato 2023
Rametlae oa lehae ebile e le seboholi sa mehleng sa People’s Choice FM (PC FM) ea tsebahalang ka lebitso la Cura eo mabitso a hae a ‘nete e leng Makara Pius Mapuru (45) oa Mohalalitoe Ha Khoase Kolobe, Maseru o hlahile lekhotleng la ‘Maseterata, Maseru ka pele ho ‘Maseterata Teboho Tapole a qosoa ka botlokotsebe ba boqhekanyetsi (forgery).
Ho ea ka lengolo la qoso, moqosuoa ka la 16 le 30 Phuptjane monongoaha a le haufi kapa liofising tsa PCFM o ile a nehelana ka lengolo la lefofo la C.O.S.C leo a iketselitseng lona ho botsamaisi ba seea-le-moea ka morero oa boqhekanyetsi.
Kahona ho thoe o tlotse litemana tsa 70 (1) (2) (a) b (3) tsa pokello ea litlolo tsa molao (Penal Code Act, 2010.
Litemana tseo ho ea ka molao o boletsoeng li bolela hore motho ea etsang tokomane ea lefofo ka morero le maikemisetso oa ho qhekanyetsa e mong o etsa tlolo ea molao ea boqhekanyetsi (forgery).
‘Muelli oa moqosuoa, Adv. Mokhachane o ile a mo kopela beile ka le reng ha a na kotsi ea ho baleha. O bontšitse hore hajoale moqosuoa ha a sebetse ho tloha ka la 3 Phupu 2023. Ho sa le joalo, ‘Maseterata o ile a mo lokolla ka beile ea M500 ‘me moqosuoa o ile a atleha ho e lefa.
O laetsoe ho se kena-kenane le lipaki tsa mofapa-hlooho. O tla hlaha khotla hape ka la 4 Loetse 2023.
