BNP E KHETHILE KOMITI E NCHA
Mafelo a beke Mokha oa Sechaba sa Basotho (Basotho National Party – BNP) o ile oa tšoara seboka sa khetho ea litho tsa komiti e kholo e ncha ho tloha ka motlatsi oa moetapele ho ea ho litho tsohle ho ea ka molao oa motheo oa mokha.
Moetapele oa BNP hajoale ke mohlomphehi Machesetsa Mofomobe ea ileng a khethoa ngoahola sebokeng se neng se le Mazenod.
Ho ea ka mongoli-kakaretso e mocha ea khethiloeng ’Mapulumo Hlao, lebaka le entseng hore ho se khethoe moetapele ke la hore bokhina-pere ba moetapele Machesetsa Mofomobe bo ntse bo le nakong.
Hlao o hlalosa hore Manasi a khethile monghali Samuel Makatse e le motlatsi oa moetapele, athe molula-setulo ke monghali Rapholo ho hlaha lebatooeng la Thaba-Tseka. Adv. ’Mamosebi Phoolo eena o khethiloe e le motlatsi oa molula-setulo.
Ho sa le joalo, mongoli-kakaretso ke eena ’Mapulumo Hlao ’me o tlatsitsoe ke Paul Malibo. Licheleteng Manasi a ile a khetha ramatlotlo e le K. Mphoso ea tlatsitsoeng ke ’Masetota Leshota ea il’o hlapantšoa e le moparamente kajeno.
Phala ea mokha ho khethiloe David Letela ha mohlophisi oa naha e le Stofolo Hloloane.
Hlao o boleletse seea-le-moea sa Peoples’ Choice FM hore likhetho li tsamaile ka khotso le mofuthu o khaphatsehang.
