BNP E AMOHELA LITHO TSE FETANG 40
Ka Moipone Makhemeng
La 13 Phupu 2023
Moetapele oa mokha oa Basotho National Party (BNP), mohlomphehi Machesetsa Mofomobe o amohetse litho tse titimetseng mokheng oa habo ka bongata maobane. Tšebeletso ea ho amohela bao e bile ntlo-kholo ea mokha (BNP Centre), Maseru.
Machesetsa Mofomobe, moetapele oa BNP
Ke bonyane litho tse mashome a mane ho kenyeletsa libini tse ‘ne ka holimo ho palo e boletsoeng tse ikakhetseng mokheng ona.Ea buileng lebitsong la litho tse ncha, monghali Thabiso Moloi, o boleletse litho tsa BNP tse neng li bokane moo hore Mofomobe o fumane ba phomotse empa a supa hore nako ena e ntse e nepahetse kaha tšebetso esale ngata joalokaha ho sa tlo kenoa likhethong tsa mak’hanselara.
“Moo re tsoang teng, re ne re le matla, re sebetsana le lebatooa leno la Machache. Empa litaba tsa moo li ne li sa otloloha hantle hoba re ile likhethong re se re arohane. Ke ka hona re reng hoja o re fumane ka nako eo a ka be a re phuthile.
“Ntate oa ka, re tla ho uena re le sebete, u tlo utloisise hore batho mokhoa bona ba ea molumong o mongata. Empa haeba re khethile ho tla ho BNP, ha rea tla hobane re batla setumo kapa moo chelete e leng ngata. Re tlile mona ho tla aha. U tlo utloisise hore re lipalo le lithupa le majoe ao u ka ahang mohlongoa-fatše ka tsona. Sebelisa banna le basali bana.” Moloi o li beha joalo.
Ho sa le joalo, Mofomobe o ile a amohela litho tse ncha. Puong ea hae o hlalositse hore litho tsena ha li’a etsa phoso ho ba karolo ea Manashenale. A bontša hore BNP ke tšepo ea sechaba ea ho qetela lehoja ho se bobebe hore batho ba hlokomele.
Litho tse titimetseng mokheng oa Manashenale
Ho tsoela-pele, Mofomobe o totobalitse hore BNP e loanela bolokolohi ba Basotho. “BNP e busitse Lesotho ka toka le ka khora. Moo ke emeng le bao ke emeng le bona, ke hore Lesotho le busoe joaloka nakong ea BNP. Ho ne ho nkha lekoenya, ho sa etsoe botsotsi bono bo ntseng bo etsoa ke Moshe (Sam Matekane) Peka mono.”
“Ho ntšuoe limilone tsa lichelete tsa Basotho ho thoe ho lengoa maboloko Peka mono; thinkhoi, ho se ho rekuoe manyolo a mangata ‘me ho thoe limilone li se li nyametse. Ho se ho thoe literekere li tetebetse, ke Moshe.
“Litaemane tsa Basotho ka mono ke mathata feela, ke Moshe. Oa bona a entse mabathanyana tjena, ke mo shebe ebe ke re motho enoa batho bana ha ba mo tsebe hantle. Empa ho nepahetse Basotho ka la 7 Mphalane 2023 ba ile likhethong ba mo khetha. We are not contesting the legitimacy of Matekane hoba o khethuoe ke Basotho. Feela ba khethile selehe sa motho.” Mofomobe o lihella likhala joalo.
