BASOTHO BA AHLOLOA BOPHELO BOHLE KA HO FENETHA LEKHOOA RSA
Ka moqolotsi oa rona
La 26 Mphalane 2023
Banna ba Basotho ba bane ba ileng ba ts’oaroa le ho qosoa ka polao e sehloho ea rapolasi oa Bonnievale, Western Cape, Afrika Boroa ka 2019, monghali Jurie ‘Tool’ Wessels ba fumane kahlolo e boima lekhotleng la ‘maseterata oa Bonnievale, Western Cape. Ba boetse ba ne ba qosoa ka teko ea polao ea ‘m’e Liezel Wessels e leng mosali oa mofu, ho qheketsa ka boqhobane, ho ba le lithunya ka thoko ho molao ekasitana le ho lula naheng ea Afrika Boroa ka thoko ho molao.
Baqosuoa kaofela ke Basotho ba Lesotho ‘me ba ne ba sebetsa polasing ea mofu. Bona ke ba latelang: Ntabanyane John Tlali, Thabiso Nomoro Ramollo, Moeketsi Max Hlauli le Keketso Thabang Matšabisa.
Kamora ho fenetha ntate Wessels, Ntabanyane Tlali o ile a qhautsoa ke sepolesa eaba bo-mphato oa hae ba balehela Lesotho. Leha ho le joalo, sepolesa sa Lesotho se ile sa ba qhautsa ‘me sa ba khutlisetsa Afrika Boroa ka 2022, ho ea arabela matjala a ba tobileng.
Ho ea ka bopaki bo teketsoeng lekhotla, rapolasi o ne a qeta ho tloha ho felehetsa basebetsi ba bang a ba isa toropong ha banna ba bane ba itšohlometsa ka tlung ka la 13 Motšeanong 2019. Ho bonahala ba ile ba tšoara mosali oa mofu (Liezel) ba mo hlokofatsa ka ho mo hlaba ka ntho e bohale sefubeng hammoho le ho mo aqatsa ka metsi a belang.
Ha ntate Wessels a khutla, le eena ba ile ba mo tšoara ba batla chelete le lithunya ba nt’o mo khakhatha ba mo fasitse. Ba ile ba ‘molaea kamora ho mo hulela kantle. Liezel o re eena nakong eo ba ntseng ba mo khakhatha o ile a ea le maili-ili ‘me ba mo siea a rapalletse ba nahana o shoele. Nakong eo a hlaphoheloang o boleletse lekhotla hore o ile a hlokomela hore bahlaseli le monna oa hae ha ba eo ka tlung.
Ke moo a ntse a lemetse joalo, o ile a khanna koloi ho ea batla thuso ho bahaisani ba lipolasi tse haufi le moo.
Hamorao setopo sa monn’ae se ile sa fumanoa ka ntlong e ‘ngoe moo lipompo tsa metsi li bolokiloeng.
Mofu Jurie Wessels [Image supplied]
Ho sa le joalo, lekhotla le ba pitlile ka kahlolo ea ho hoehla bophelo bohle chankaneng kaofela hoa bona. Ba boetse ba tabotsoe ka kahlolo ea lilemo tse 30 tsa teko ea polao ea Liezel, bosholu ba boqhobane, ho ba le lithunya tse seng molaong hammoho le ho lula Afrika Boroa ntle le tumello.
