BABUELLI BA KOPA MOTINYANE HO BUA LINYEOE KA SEQO
Ka Moipone Makhemeng
La 8 Mphalane 2023
Babuelli ba baqosuoa linyeoeng tse hlano tse hlahelletseng, moo e ‘ngoe ea tsona ho qosoang baetapele ba mekha ea lipolotiki Mothejoa Metsing oa Lesotho Congress for Democracy le Selibe Mochoboroane oa Movement for Economic Change ka teko ea ho liha ‘muso ba kentse kopo ea hore Mochochisi e Moholo, Adv. Hlalefang Motinyane e-be eena ea chochisang linyeoe. Ba batla a batle bachochisi bang ho chochisa linyeoe hofihlela qetellong. Sena se latela hore bachochisi ba babeli, Adv. Shaun Abrahams le Adv. Motene Rafoneke ba itokolle linyeoeng tseo.
Maobane moahloli Charles Hungwe o ile a mamela kopo ena. Adv. Kabelo Letuka, e le e mong oa liakhente o boletse hore motheo oa kopo ea bona ke hore bachochisi ba itokollotseng ba tsebisitse lekhotla hore likamano tsa bona le Mochochisi e Moholo li senyehile hoo ho ke keng hoa ba le poelano.
Moahloli Charles Hungwe
“Ho se be le monyetla oa poelano ho bolela hore taba ea hore Mochochisi e Moholo o na le matla a ho khetha bachochisi ka makhotleng ha e bolele hore a sebelise matla a hae hampe.
“Linyeoe tsena li ne li behetsoe ho tsoela-pele kajeno ka la 7 Phato 2023 ho ea pele ‘me e ne e le ka la 3 Phato 2023 ha bachochisi ba babeli ba tlisa kopo ea boitokollo.”
“Ofisi ea Mochochisi e Moholo e na le tsohle. E na le bachochisi ‘me re etsa thapeli kopong ea rona,; ho bile le tiehiso tse ngata, moo mofapa-hlooho o bileng le bothata ka boemeli ba oona hobane bachochisi ba ne ba sa tle khotla.
“Ka nako e ‘ngoe ba supa mabaka koana le koana. Nthoena ka boeona e amme linyeoe tsena. Lebitsong la baqosuoa, re itela ho lekhotla le khabane hore Mochochisi e Moholo a chochise linyeoe tsena ka seqo kapa a thonye liofisiri tsa hae ho bona hore linyeoe tsena li tsoela pele.
“Ka lebaka leo, seo re se kopang ke hore Mochochisi e Moholo a re hlalosetse na o se a lokile hore re ka tsoela-pele ka nyeoe hajoale kapa che! Seo a tlang ho se hlalosetsa lekhotla ke hore ke hona a il’o fumana ‘muelli kapa a ilo ithuta tokete ea baqosuoa. Sena ka bosona se ama litokelo tsa baqosuoa kaha linyeoe tsa bona li tla chechisoa.” Adv. Letuka oa hlalosa.
Ho feta mona, Adv. Letuka o teketse lekhotla hore baqosuoa esita le lekhotla ha ho moo ba kenang likamanong tsa bachochisi le Mochochisi e Moholo. O tsitlalletse hore ntle le hore lekhotla le sireletse litokelo tsa baqosuoa ka ho netefatsa hore ha matsatsi a linyeoe a behiloe, nyeoe e tsoela-pele, linyeoe tsena li tla buuoa ka selemo sa 2030. O re Mochochisi e Moholo o hlekefetsa tsamaiso ea lekhotla kaha ba na le matla a ho khetha bachochisi ba bacha.
Mochochisi e Moholo, Adv. Hlalefang Motinyane o behile kapele ho lekhotla hore seo a lokelang ho se etsa ke ho bona hore linyeoe tsena li tsoela-pele ka thello ntle ho tiehiso ea letho.
Adv. Kabelo Letuka
“E ka ba ‘na ka seqo kapa bachochisi ofising ea heso ba nang le bokhoni ba ho li chochisa.” Ke eena a bua ka khotla.
O teketse lekhotla hore o ne a ntse a etsa mosebetsi oa hae le ho phethahatsa litokelo tsa hae ha a ne a khetha bachochisi ba babeli ba itokollotseng. A re o ne a sa senye nako ea lekhotla empa ka bomali-mabe boemo bona ba litaba bo ile ba oela ofising ea hae.
“Ke batla ho hopotsa lekhotla hore nyeoe e ne e le ka pela Moahloli Makhetha, mabapi le taba ena moo re ileng ra bolelloa hore ‘muelli oa moqosuoa oa pele le oa bobeli, Adv. Ratau a ke ke a ba teng kapela lekhotla kaha a ke ke a hlotse a tsoela-pele.” Adv. Motinyane oa hlalosa.
Ho sa le joalo, moahloli Charles Hungwe o qheletse ka thoko taba ea hore ho bile le tieho kapa ho chechisoa. O itse seo ha se bopaki ba hore lehlakore le itseng le sebelisa tsamaiso ea lekhotla hampe.
A re hafeela ho na le mabaka a utloahalang kapa tlhaloso e utloahalang mabapi le tieho e joalo e ke ke ea ba motheo oa hore lekhotla le fihlele qeto ea hore lehlakore leo le sebelisa tsamaiso ea lekhotla hampe. Ka hona a supa hore ha ho na letho lipampiring le bontšang hore kopo ea bona e ka amoheloa.
