BABELAELLOA POLAONG EA MAHOSI KHOTLA
Ka Moipone Makhemeng
La 24 Pulungoana 2023
Mohlanka Matsipa (44) oa Ha Fako, Maseru, ke ofisiri ea ‘muso, e leng moqhobi oa koloi ea mookameli oa mehleng oa Lefapha la Likoluoa (Disaster Management Authority – DMA), mofu ‘Makhotso Mahosi o hlahile khotla a qosoa le banna ba babeli, Mahao Ramookho (32) oa Ha Molengoane, Nazareth, le Mpho Neo Taelo (24) oa Ha Ralejoe, Nazareth, ba qosoa ka ho bolaea ‘Makhotso Mahosi le mora oa hae Kabelo Mahosi esita le teko ea polao ea Lineo Thola ketsahalong e bileng ka la 29 Mphalane 2023.
Matsipa le baqosuoa ba hlahile kapele ho ‘maseterata Nkhethoa Molapo. Ba tobane le liqoso tse ‘maloa ho kenyelletsa le tse peli tsa polao, teko ea palo e le ‘ngoe, liqoso tse peli tsa bosholu ba boqhobane ba hlometse le ho ruoa lithunya tse peli tsa 9mm ka thoko ho molao.
‘Maseterata Molapo ha a bala lengolo la qoso o itse baqosuoa ka la 29 Mphalane 2023 ba le haufi kapa Ha Matala Phase 1, ba ile ba thunya ‘Makhotso Mahosi le mora oa hae Kabelo Mahosi ‘me ba baka mafu a bona. Letsatsing le tšoanang ba ile ba thunya Lineo Thola ka sepheo sa ho mo timetsa empa leha ho le joalo o ile a pholoha.
Baqosuoa ba boetse ba tlalehoa ka lona letsatsi leo ba ile ba utsoa chelete e sa tsebahaleng ho sepolesa le laptop ea moetso a Dell. Ho feta mona, ho thoe ba ile ba ikhapela koloi ea Mercedes Benz ea linomoro tsa E471BBN eo e neng e le ea ‘Makhotso Mahosi kapa e le boliseng ba hae.
Hara litokelo tsa bona tseo lekhotla le ileng la ba tsebisa tsona ke ho ikopela beile lekhotleng le phahameng kaha hara liqoso tse ling tse ba tobileng lekhotla la ‘maseterata ha le na matla holim’a tsona. Baqosuoa hajoale ba lebile chankaneng ‘me ba tla boela ba hlaha khotla ka la 5 Tšitoe 2023.
Mochochisi nyeoeng ena ke Adv. Motiki ha babuelli ba baqosuoa e le Adv. Pheko le Adv. Monate.
