BA QOSOA KA HO QHEKANYETSA ‘MUSO MATSEBE-TSEBE, ‘MANTHABISENG
Ka Moipone Makhemeng
La 8 Mphalane 2023
Lefapha la Toantšo ea Bobolu le Bomenemene (Directorate on Corruption and Economic Offences -DCEO) le huletse banna ba babeli le mosali lekhotleng la ‘maseterata Maseru ho ba qosa ka ho ikhapela M313 100.01 ea ‘muso ka boqhekanyetsi le masene a ho hlatsoa chelete.
Moqosuoa oa pele ke monna oa Mosotho, Bokang Thelelisane Semoko (34) oa Motse-Mocha, Mohale’s Hoek, oa bobeli le oa boraro ka tatellano ke bahlanka ba ‘muso Itumeleng Moerane (42) oa Ha Abia, Maseru le monghali Maloto Mpeta Sehlabo (48) oa Masowe II Maseru.
Moqosuoa oa pele o hlalosoa e le mohoebi oa k’hamphani e bitsoang Pro Air solutions, ha oa bobeli, Moerane e le Senior Procument Officer lekaleng la Kabinete empa nakong ea liketsahalo tseo ba qosoang ka tsona o ne a sebetsa e le mongoli botong ea khiro lefapheng la likoluoa (Disaster Management Authority – DMA). Monghali Sehlabo o hlalosoa a sebetsa Manthabiseng Convention Centre e le Banquet Manager.
Lengolo la qoso le hlalosa hore ka la 10 Loetse 2022 haufi kapa toropong ea Maseru baqosuoa kaofela ba entse tlolo ea molao ea bobolu ka ho ikhapela ka bolotsana chelete ea ‘muso e kaalo ka M313 100.01.
Qoso e re ka la 10 Loetse 2022, le pele mosebetsi o phetheloa moqosuoa oa bobeli le oa boraro ba ile ba bua leshano la hore mosebetsi o phethetsoe ho ‘muso empa ho se joalo. Ke moo ba ileng ba etsa hore M313 100.01 ea ‘muso e lefshoe ho moqosuoa oa pele.
Motheho oa litaba tsena ho ea ka lengolo la qoso ke hore ho bile le morero oa ho lokisa mechini e pholisang moea (air conditioners) ‘Manthabiseng Convention Centre e le ho lokisetsa seboka sa lihlooho tsa linaha tsa Mokhatlo oa Kopano ea Linaha tsa Afrika (African Union – AU) se neng se lokela ho tšoaroa ka la 3 Phato 2022.
Taelo ea ho aba mosebetsi oa tokiso ea mechini e ile ea fanoa ke e mong ‘Makhotso Mahosi ka Phupu 2022. Ho ile hoa nkoa qeto ea hore mosebetsi o ajoe ka ho thonya k’hamphani e nang le makhabane ka lebaka la nako e neng e fokola pele ho seboka (selective tendering).
Mosebetsi oa ho fumana k’hamphani e tla abeloa mosebetsi o ile oa fuoa e mong mofumahali Pekeche ‘me eena a fumana mabitso a mararo a lik’hamphani tse ka etsang tšebetso ena e leng: Amalgamated Engeneering Solutions, Chlorofloro Carbon Free (PTY) Ltd le e ‘ngoe. Pekeche o ile a hloaea Amalgamated Engeneering Solutions e le k’hamphani eo a e tšepang hore e ka etsa mosebetsi.
Kamora hore Pekeche a fane ka tlaleho ho mong’a hae Moerane, eena o ile a hlakola Amalgamated Engeneering Solutions ‘me sebakeng sa eona a kenya k’hamphani ea Pro Air Solutions feela a sa hlalosetsa Pekeche hore na o etsa seo ka mabaka afeng.
Boto e abang mesebetsi lekaleng leo e ile ea lumellana le Moerane ‘me mosebetsi oa abeloa Pro Air Solutions. Ke moo monghali Semoko a ileng a kopa Sekhoane Tlaitlai le Ntaote Ramaphalla ho tsoa k’hamphaning ea Megaglow ho mo thusa ho hlahloba mechini bakeng sa tokiso.
Bahlanka bao ba Megaglow ba ile ba ea ‘Mathabiseng ho hlahloba mechini ‘me ba fana ka lethathamo la thepa e shoeleng e lokelang ho rekoa le ho kenngoa ea boleng ba M132, 930.00 ‘me chelete ena e ne e kenyelelitse matsoho a ho etsa mosebetsi ona.
Leha ho le joalo, moqosuoa oa pele o ile a lahlela likhakanyo tseo tsa thepa le mosebetsi tsa bahlanka ba Megaglow matjoing eaba o iketsetsa tsa hae tsa boleng ba M313, 100.01.
Ka mora nako, moqosuoa oa pele o ile a re oa boraro (Sehlabo) a tekenele karete e bontšang hore tšebetso e felile hore a tsebe ho pataloa. Moqosuoa oa boraro o ile a hlahloba tšebetso empa a se kholisehe hore mechini e sebetsa kaofela empa a tsoela-pele a tekenela karete e bontšang tšebetso e phethetsoe.
Ka lehlakoreng le leng, Pekeche o ile a hlahloba mosebetsi ‘me a bona hore mechini e meng ha e sebetse eaba o hana ho lokisa lipampiri tsa ho patala.
Pekeche o boetse a tlaleha boemo bona lefapheng la lichelete empa Mahosi a laela hore lipampiri tsa tefo ea mechini li tlisoe ofising ea hae.
Semoko a boela a etsa tšalo-morao ho Mahosi hore na tefo e se e le hakae. Kamora ho ba le kopano le moqosuoa oa pele, Mahosi o ile a laela lefapha la lichelete ho lefa moqosuoa oa pele, M313 100.01.
Qoso ea bone e re moqosuoa oa bobeli le oa boraro ba buile leshano ka morero oa ho qhekanyetsa ‘muso ka hore Pro Air Solutions ke k’hamphani e ngolisitsoeng ka la 14 Pherekhong 2022 empa ho se joalo kaha e ngolisitsoe ka la 14 Phupu 2023 ‘me e ne e se na tokelo ea ho fuoa mosebetsi ho latela ngoliso ea eona e haufi le phano ea mosebetsi.
