BA QOSOA KA HO KOENYA M4 MILONE EA ‘MUSO
Ka Moipone Makhemeng
La 16 Phato 2023
Banna ba babeli le mosali, Lefu Manyokole (59) oa Qoaling, Maseru, ‘Makhotso Mahosi (46) oa Ha Matala Maseru, Pitso ‘Biker Boy’ Ntsukunyane (27) oa Lithabaneng, Maseru hammoho le k’hamphani ea LL Construction Pty Ltd, eo monga eona e leng Ntsukunyane ba hlahile lekhotleng la ‘maseterata ‘Mamorojele Qoo oa Maseru kajeno ka qoso ea bobolu le bomenemene ba ho ikhapela matsebe-tsebe a ‘muso.
‘Maseterata ‘Mamorojele Qoo
Lekhotla le bontšitse ha Lefu Manyokole e le Mongoli e Moholo oa mehleng Lekaleng la Puso ea Libaka le Borena, moqosuoa oa bobeli, ‘Makhotso Mahosi o ne a tšoere molepo e le mookameli oa Setsi sa Likoluoa (Disaster Management Authority – DMA) ebile e le eena ramatlotlo e moholo lefapheng leo.
Ntsukunyane o hlalosoa e le mohoebi ebile e le eena mothehi a le mong feela oa k’hamphani e qosoang e hlahang e le moqosuoa oa bone – LL Construction Pty Ltd.
Ho ea ka lengolo la qoso, baqosuoa ba sebetsa ka morero o tšoanang lipakeng tsa Mphalane le Pulungoana 2022 haufi kapa liofising tsa DMA, Maseru, moqosuoa oa pele le oa bobeli bao e neng e le bahlanka ba ‘muso ba ile ba sebetsa ‘moho ka bobolu le morero oa ho ithuisa ba sebelisa k’hamphani ea moqosuoa oa boraro, LL Construction Pty Ltd.
Qoso ea pele e totobatsa hore ba qosoa ka ho tlola temana ea molao oa thibelo ea bobolu le bomenemene ea 21 (3). Ba belaelloa ba entse sena ka ho aba mosebetsi oa ho aha borokho Seboche, Butha-Buthe ka litsela tse sa hlakang tsa bobolu ba sa latela mecha e nepahetseng ea kabo ea mesebetsi ea ‘muso.
Adv. Ts’eliso Fiee
Qoso ea bobeli, ke hore moqosuoa oa bobeli (‘Makhotso Mahosi) ka la 21 Pulungoana 2022 a le liofising tsa DMA kapa haufi le tsona o ile a fana ka leseli la leshano e le moemeli oa DMA hore k’hamphani ea LL Construction Pty Ltd e ne e fuoe mosebetsi oa ho aha borokho Seboche empa a ne a tseba hantle hore phano ea mosebetsi o joalo e entsoe ke eena ka bobolu. Boitšoaro bona bo hlalosoa bo bakile hore ‘muso oa Lesotho o lahleheloe ke matsebetsebe a kaalo ka M4,538,900.14.
Mochochisi ke ‘Mamongonyo Baasi athe Adv. Salemane Phafane (KC) o buella moqosuoa oa pele leha a ne a le sieo ka khotla ‘me Adv. Letsatso Mosoeu o ne a mo eme nokeng. Adv. Mosoeu o buella moqosuoa oa bobeli ha Adv. Tšeliso Fiee a buella moqosuoa oa boraro.
‘Mamongonyo Baasi, mochochisi
Baqosuoa ba ile ba ikopela beile ‘me bochochisi ba se e hanyetse. Ba laetsoe ho itefella beile ea M10 000 motho ka mong le ho beha paneng thepa e sa tsamaeeng e fumanehang seterekeng sa Maseru.
Leha ho le joalo, ba hlolehile ho itefella beile kaha ofisi ea lichelete e ne e koetsoe eaba ba theohela toronkong. Tebello ke hore hosane ba tla itefella ba lokolohe.
Adv. Letsatsi Mosoeu
