MORENA OA SEHLOOHO O AHLOLOA LILEMO TSE 27
Ka Moipone Makhemeng
La 21 Tlhakubele 2024
Morena oa Sehlooho oa Tebang, Tšakholo le Seleso, Khoabane Emmanuel Mojela o ahloletsoe ho hoehla lilemo tse 27 teronkong ka lebaka la ho baka lefu la motsoala oa hae Tšenolo Letsie eo a ileng a mo thunya ka la 18 Motšeanong 2020 motseng oa Tšakholo, Mafeteng.
Nyeoe e ne e mametsoe ke moahloli oa Lekhotla le Phahameng, Maseru, moahloli ‘Mabatšoeneng Hlaele ha mochochisi e bile Adv. Lehlanako Mofilikoane athe moqosuoa o ne a buelelloa ke Adv. Jafta Thamae.
Ntle le ho hlola lilemo tse 27 chankaneng, moqosuoa o laetsoe ho tsosa hlooho ea mofu ka ho lefa likhomo tse ‘ne (4) kapa ho fana ka chelete ea boleng ba likhomo tse kaalo.
Moahloli ‘Mabats’oeneng Hlaele, o liha kahlolo [Image supplied]
“Ho ipapisitsoe le eona nyeoe eo ea Letuka, nako eo lekhotla le fanang ka maikutlo a lona malebana le taba ena, lekhotla le fumana hore moqosuoa e ne e le motho ea lulang Mafeteng mahaeng. E leng moo boloi sechabeng e leng ntho eo ho lumeloang ho eona. Ke ka hona pejana re ileng ra iphumana ho na le mabaka a pebofatso ea kotlo.” Moahloli Hlaele oa hlalosa.
Adv. Lehlanako Mofilikoane, ‘muelli oa mofapa-hlooho
Tabeng ea pebofatso ea kotlo, moahloli o tšetlehile hore joalokaha leqoetha la hae le hlalosa, lena ke lekhetlo la pele moqosuoa a etsa tlolo ea molao. O na le lelapa ebile o ile a inehela sepoleseng hape esale a na le tšebelisano-‘moho ha nyeoe e ntse e tsoela-pele ka ho tla lekhotleng nako eohle. O boetse ka ‘muelli oa hae o ile a bontša khahleho ea ho tsosa hlooho ea mofu.
A supa hore ha ho shejoa mabaka a kotlo e eketsehileng, mofapa-hlooho o ile a teka hore bophelo ba motho ke taba e tlamehang e shejoe e le taba e halalelang. A toboketsa hore ha a ne a hlompha taba ea khalalelo ea bophelo, a ka ba shebile mekhoa e meng ea ho sebetsana le botlokotsebe ba mofu haeba o ne a na le botlokotsebe e le kannete.
Moahloli Hlaele ha a kena kotlong o ile a teka hore lekhotla le tataisoa ke sepheo sa ho fana ka kotlo e leng se kenyelletsang khalemo, ho khutlisa motho mekhoeng le hore ba utloisitsoeng ba tle ba thobehe lipelo.
“Ka ho etsa joalo, ke tla ipapisa le lipehelo tse ileng tsa tekoa nyeoeng ea R vs Z. Tse neng li supa hore kotlo e lokela hore e-be e tšoanelang moqosuoa, le e tšoanelang tlolo ea molao. E-be e tla hlokela sechaba leeme ‘me hape e tsoake le mohau ho ipapisitsoe le maemo a teng.” Moahloli Hlaele o tšoaela joalo.
O ile a re moqosuoa o tobane le qoso e mpe ea tlolo ea molao e leng polao. A re bobe ba polao hape ke bokhopo ho ba utloisitsoeng bohloko.
“Joalokaha ke ile ka bontša pejana kahlolong ea ka tabeng ea hore ke ile ka lemoha ho koata le khalefo ho mohlolohali nakong eo a neng a hlalosa moqosuoa e le ‘molai oa molekane oa hae.” Oa hlalosa.
Ha a liha kotlo, o ile a supa hore Lesotho mona ha morena oa sehlooho a entse tlolo ea molao, litaba-tabelo tsa sechaba ke hore e-be ofisi ea morena ha e ea lokela hore e-be eona e mo tšolang hore a se fumane kahlolo e tšoanang le ea mang le mang.
Moahloli o ile a ribela moqosuoa lilemo tse 27 chankaneng le ho mo laela ho tsosa hlooho ea mofu ka likhomo tse ‘ne.
