SEPOLESA SE AMOHELA MABONE A SEPHETHE-PHETHE
Ka Matlhohonolofatso Lebesa
La 14 Tlhakubele 2024
Bookameli ba sepolesa bo amohetse mpho ea mabone a mane (4) a sephethe-phethe a letsoho ho tsoa ho mohoebi oa Ha Tsolo, monghali Potso Rabeng maobane ntlo-kholo ea sepolesa.
Mohlahlami oa mookameli oa sepolesa lefapheng la tsamaiso, DCP Sera Makharilele ha a bua kamohelong ea mabone ao o itse ha ho qea-qeo hore mabone a tlil’o phahamisa phallo e potlakileng ea sephethe-phethe mebileng.
Monghali Potso Rabeng
“Kajeno re motlotlo ho ba le uena ntate Rabeng ho tla amohela mpho ena e kholo, eo ha re e sheba re bona e le thepa feela athe taba eo ehlile ha se thepa feela empa e na le molaetsa o moholo o eang sechabeng sa Basotho. Re bokane mona ntate ho tla u leboha ka mpho ena e khethehileng eo u re fileng eona ebile e le ea bohlokoa.” DCP Makharilele o leboha Rabeng joalo.
Monghali Rabeng o ile a nehelana ka mabone ao ho ea tšoereng molepo e le mookameli oa sepolesa, Dr. Mahlape Morai. Rabeng o hlalositse hore se mo susumelitseng ho fana ka mabone ao ke ho hlokomela hore mapolesa a sokola taolong ea sephethe-phethe haholo tikolohong ea Ha Thetsane, Maseru.
Dr. Mahlape Morai o amohela mabone ho tsoa ho mofani monghali Potso Rabeng
O supile hore ho fihlile tlhokomelong ea hae hore a kenye letsoho e le monna oa Mosotho hore a thusetse hore sepolesa sa habo se tsebe ho laola sephethephethe hantle.
“Ka nako e ’ngoe ha ke ntse ke tsamaea tseleng ke ee ke bone hore mapolesa a macha a sokola ha a laola sephethe-phethe. U tla fumana hore ha a sokole a sokolela li-ka-mpa-tsa-ea. A sebelisa litoche ho bonesa empa khanya ea toche ha e bonahale. Eaba ho tla ho ‘na hore ke lokela ke etse ho hong. Bo- ‘m’e le bo-ntate tsatsing lena ke tlo nehelana ka mabone.” Rabale o hlalosa se mo susumelitseng.
O bontšitse a rekile mabone ao eaba ka litsebo tsa hae o’a fetola hore a tle a thuse ho laola sephethe-phethe.
O tsoetse-pele a hlalosa ka moo mabone ao a sebetsang ka teng . A re lebone ha le bonesa ‘mala o motala ke ho lumella moqhobi ho feta empa ha le panya ka boputsoa le tla be le bontša hore le se le tla koala.
Dr. Mahlape Morai, ea ts’oereng molepo e le mookameli oa sepolesa
E le ho phethela mosebetsi oa letsatsi, ea tšoereng molepo e le mookameli oa sepolesa, Dr. Morai o lebohile mpho ena, a re mabone a tlo akofisa bosebeletsi ba sepolesa mebileng le ho boloka tšireletseho le polokeho sechabeng.
“Nanabetso ea letsoho eo re bang lipaki tsa eona kajeno ho tsoa ho ntate Rabeng ke phethahatso ea chebelo-pelo ea sepolesa sa Lesotho e reng; ‘Sepolesa sa Lesotho se tla sebetsa hammoho le mekhahlelo eohle ea Sechaba ho bolokela naha ea Lesotho tšireletseho le polokeho.’
“Ke phethahatso hape ea polelo ea metheo ea sepolesa lefatše ka bophara e reng; ‘Sepolesa ke sechaba, sechaba ke sepolesa.’ Ntate Rabeng oa re hopotsa bohle hore re le sechaba sa Basotho ha re ke re ipotseng bohle hore na re kenya letsoho joang tšireletsong le polokehong ea naha ea Lesotho.” Dr. Morai o rialo.
O lihelletse likhala ka hore ketso ea Rabeng e ba kokobelitse e le sepolesa sa Lesotho ‘me a tiisetsa Rabeng le Basotho ka kakaretso hore ba tla lula ba ikotla sefuba ka litšebeletso tsa sepolesa sa Lesotho tse nang le boiphihlelo le ponaletso.
