LEKHOTLA LE LAELA IEC HO HLAKOLA MEKHA E SA IKOBELENG TSAMAISO
Ka Moipone Makhemeng
La 6 Tlhakubele 2024
Lekhotla le Phahameng la Maseru, le lihile kahlolo ka la 29 Hlakola 2024, nyeoeng e hlahletsoeng ke mokhatlo o loanelang litokelo tsa botho – Transformation Resource Centre (TRC).
TRC e ile ea ritela nyeoe hammoho le mokha o mong oa lipolotiki, Democratic Party of Lesotho (DPL) moo baqosuoa e neng e le Komisi e Ikemetseng ea Likhetho (Independent Electoral Commission- IEC) le mongolisi e moholo oa mekhatlo (Registrar General).
Nyeoe e ile ea mameloa ke baahloli ba bararo; Sakoane Sakoane, Molefi Makara le Moneuoa Kopo ngoahola.
Balli ba seng ba boletsoe ba ne ba kentse kopo ea hore lekhotla le laele baits’ireletsi nyeoeng ena ho hlakola mekha ea lipolotiki e hlolehang ho latela boitlamo ba eona ba molao tlas’a molao oa likhetho (National Assembly Act No.14, 2011 le Melaoana ea Ngoliso ea Mekhatlo, 1967)
Le hoja nyeoe e ne e hlahletsoe ke TRC le DPL, molli oa bobeli h’a ka iponahatsa khotla ‘me lekhotla le ile la nka a itokollotse nyeoeng.
Balli ba ne ba boetse ba batla hore lekhotla le phatlalatse hore ho hloleha hoa IEC ho hlahloba le ho hlakola ngoliso ea mekha e sa ikobeleng tsamaiso ea mekha ea lipolotiki ho latela karolo ea 27 ea molao oa Likhetho o baloa le temana ea 66 A (1) (g) ea molao oa motheo oa Lesotho oa 1993 (joalokaha o hlomathisitsoe) ha ho molaong ebile ke ho tlola molao ho se ikamahanye le tsamaiso.
Ho ea ka tokomane ea kahlolo, likhang tsa pele tse phehiloeng ke baikarabelli e bile ho phephetsa hore na balli ba na le boemo (locus standi) ba ho qosa. Bona ba ile ba fana ka maikutlo a hore matla a ho hlakola ngoliso ke a IEC joalo ka bolaoli le ho netefatsa hore mekha ea lipolotiki e latele melao.
Baqosuoa ba ile ba tsoela-pele ba toboketsa hore balli ba hlolehile ho bonts’a boteng ba litokelo leha e le life ‘me kahoo ba hloleha ho bonts’a sesosa leha e le se le seng sa ho nka khato.
Qetellong lekhotla le lihile kahlolo ka ho laela IEC hore e etse tlhahlobo e felletseng hore ke mekha efe e sa ikobeleng tsamaiso ‘me e e hlakole hang-hang ho ea ka temana ea 25 (1) (c) & 29 (3) ea National Assembly Act. Taelo ea lekhotla ke hore sena se be se phethiloe ke IEC kahara matsatsi a 45 ho tloha ka letsatsi la taelo.
Balli ba ne ba buelloa ke Attorney Monaheng Rasekoai le Adv. Christopher Lephuthing ha baikarabelli ba ne ba buelloa ke Adv. Kabelo Letuka, Adv. R.A Ntema, Adv. M. Mokobocho le Adv. K.D Mabulu.
