BA QOSOA KA HO UTSOA M1.8 EA EXECUTIVE TRANSPORT
Ka Moipone Makhemeng
La 7 Hlakola 2024
Banna ba Basotho, Thabang Shosholo (31) oa Ha ‘Mamathe, Berea ea sebetsang e le Graphic Designer k’hamphaning ea Lephema Executive Transport le Malefane Mosothoane (37) oa Koalabata, Berea ea sebetsang e le Plant Operator ba hlahile kapele ho ‘Maseterata oa Maseru, Peete Molapo. Ba tobane le qoso ea ho utsoa chelete e kaalo ka M1,839,499.20 k’hamphaning eo ka bomenemene.
Ha a ba balla qoso, ‘maseterata o ba bolelletse hore ba qosoa ka ho tlola temana ea 68 (1) ea lipokello tsa litlolo tsa molao, 2010 (Penal Code, 2010).
“Ho thoe lona lipakeng tsa ‘Mesa 2023 le Hlakola 2024 le le Lephema Executive Transport ka Seteishining, Maseru kapa pela teng le sebetsa ka morero o tšoanang oa ho etsa botlokotsebe, le ile la nehelana ka litokomane tsa lefofo ho basebetsi ba Lephema Executive Transport e le ho pata ‘nete eo le neng le e tseba.” Qoso e baloa joalo.
Ha e tsoela-pele e re: baqosuoa ba ile ba nehelana ka ‘bank confirmations’ tsa maiketsetso samokana-eka bareki ba samente ba patetse samente eo ba e rekileng ho k’hamphani. Ka lebaka la lipampiri tseo tsa leshano, k’hamphani e ile ea fa bareki bao samente. Qoso e re bolotsana bona bo bakile hore Lephema Executive Transport e lahleheloe ke M1,839,499.20.
Kamora ho bolelloa litokelo tsa bona tsa ho ipatlela ‘muelli, baqosuoa ba ile ba ikopela beile ‘me lekhotla le ba laetse ho lefa M10, 000 motho ka mong le ho beha paneng thepa ea boleng ba chelete e kaalo ka M100 000 motho ka mong. Ba tla boela ba hlaha khotla ka la 20 Hlakola 2024.
