‘MUSO O ITOMA MOHATLA KA LIKHOHO
Ka Moipone Makhemeng
La 25 Pherekhong 2024
Ho qhoma hoa lefu la likhoho (Avian Influenza) Afrika Boroa ho bakile mathata a phepelo ea lihlahisoa tsa likhoho naheng ea Lesotho kaha ‘muso o ile oa koala maliboho hore lihlahisoa tsohle li se kene kapa ho tsoa kahara naha ka la 20 Mphalane 2023.
Bekeng e fetileng, letona la temo, Thabo Mofosi o ile a phatlalatsa hore ho tla lumelloa feela likhoho tse hlabuoeng tse tlang li le kahara lihatsetsi (frozen chicken) ho kena Lesotho hammoho le mahe a qhotsiso ea litsuonyana (fertile eggs) ho hlaha Afrika Boroa. Leha ho le joalo, ‘muso o itomme mohatla kaha o lokollotse phatlalatso e supang hore mahe ‘ohle a se lumelloe ho kena Lesotho ekasitana le a qhotsiso.
Litho tsa mokhatlo oa Lihoai le Bahlahisi ba bo-’Malitšibana
Taba ena e halefisitse barui le bahoebi ba likhoho kaha ba re khoebo ea bona e ntse e nyotobetse, ba sitoa ho hoeba. Ba re likhoho tsa Afrika Boroa tse hatsetseng li rekoa ke mabenkele koano Lesotho ao boholo e leng a Afrika Boroa. Ka tsela eo, taba eo ha e tsoele Basotho molemo kaha chelete e ntse e potoloha lipokothong tsa Ma-Afrika Boroa.
E le ho fumana tharollo mathateng a lihoai tsa likhoho, maobane mokhatlo oa Lihoai le Bahlahisi ba bo-’Malitšibana o bile le ‘moka oa litaba holong ea Mofumahali oa Tlholo, Maseru. Molula-setulo oa mokhatlo oo, Mofumahali ‘Mantsane Rantekoa o teketse baphatlalatsi hore ba tso’ere tlaleho ea Mokhatlo oa Lefats’e oa Bophelo ba Liphoofolo (World Organisation for Animal Health) e tlalehang hore Afrika Boroa ha e-s’o be le ts’oaetso e ncha ea sefuba sa likhoho.
mokhatlo oa Lihoai le Bahlahisi ba bo-’Malitšibana
Kahona, boipiletso ba mokhatlo ke hore ‘muso o ba lumelle ho reka lihlahisoa tsohle Afrika Boroa.
‘Muso o ts’episitse ho khahlametsa lihoai ka ho reka lihlahisoa tse thibetsoeng linaheng tse ling joaloka Eswatini, Brazil, Zambia joalo-joalo.
Ho sa le joalo, mongoli oa mokhatlo, mofumahali Rethabile Mokaeane o bonts’itse ba se na bothata ba ho itatela likhoho linaheng tse ling tse kantle ho Afrika Boroa. Leha ho le joalo, Mokaeane o rapalalitse liqholotso tseo ba tobaneng le tsona malebana le ho lata lihlahisoa tsa likhoho linaheng tse mose.
“Liqholotso li teng ho lata thepa mafats’eng a hole. Re ne re ka ikisa hobane ha u se u na le likhoeli tse hlano u le ka thoko ho khoebo kapa mosebetsi, u se u le nku ea sehlabelo feela e reng u tla ananela hore na ho thoe u etse joang. Empa ha u leka ho etsa joalo u ntse u fumana hore joale ho hlokahala lintho tse kang transit permit.
“Re naha e likanyelitsoeng ke Afrika Boroa;
ho re na re ka tsoa le kae, boema-fofane boo re ka bo sebelisang ke Moshoeshoe I kapa ba OR Tambo, Gauteng. Ha re tloha OR Tambo re ntse re tlo tsamaea kahara eona naha ena.
“Ho hlokahala transit permit. Ke bothata hoba ha re fumane thuso lekaleng. Leha ho le joalo, ba bang ekare ba tla finyella hobane ba sebetsa hantle le lekala. Re mathile likopanong re ikokobetsa re re khetlong lena rea utloa hee, le Zambia re khutla teng. Ha re tloha teng re fumane qholotso ea hore re ke ke ra tseba ho thusoa.
“Re batla ho etela linaheng tse kang Brazil empa ha re tsebe na re bua le bo-mang. Re tla fuoa li-permit feela e tla re ha u re thepa ea fihla u fumane likhoqetsane tse ngata.” Mokaeane o lihella likhala.
