LIAKHENTE LI THULANA LE KEREKE E K’HATHOLIKE
Ka Moipone Makhemeng
La 12 Pherekhong 2024
Liakhente tsa Bakreste (Christian Advocates) le mokhatlo oa Ambassadors Association li qhololitse qeto ea Mopapa Francis e lumellang Baprista ba kereke ea K’hatholiki ho hlohonolofatsa batho ba nang le likamano le batho ba bong bo le bong (same sex couples).
Mongoli oa lengolo ke Adv. Fusi Sehapi. O simolla lengolo joana: “Re babuelli ba molao ho tsoa Christian Advocates le Ambassadors Association. Re laeloa mona ke babuelloa ba rona; ba re ka la 17 Ts’itoe 2023, Mopapa Francis o phatlalalitse hore Baprista ba hlohonolofatse manyalo a likamano tsa bong bo ts’oanang (same sex marriages).” Adv. Sehapi o ngotse joalo lengolong la la 8 Pherekhong 2024.
Leha ho le joalo, balli ba re taba ea hore Mopapa a phatlalatse hore kereke e ke ke ea hlohonolofatsa manyalo a batho ba bong bo le bong empa e tla hlohonolofatsa batho ba bong bo le bong, seo se ka thoko ho Bible ea Molimo.
“Ho hlohonolofatsa ho hlalosoa e le ho ‘lumella hore ntho e ‘ngoe e etsahale’. Taba ea hore Kereke e ke ke ea hlohonolofatsa manyalo a batho ba joalo empa e lumele ho hlohonolofatsa kopano ea batho bao ke leqheka feela la ho lumella sebe. Ho feta mona seo ke ho lumella seo melao ea naha ea Lesotho e se thibetseng.” Ho rialo lengolo la Adv. Sehapi.
Sehapi o re Bibele e hlakile hore ha ho ka moo Kereke e K’hatholike e ka fetolelang thohako ho tlhohonolofatso ka teng.
“Lentsoe la Molimo ha le lumelle likamano tse joalo; ho lumella taba ena e tla be e le ho fetolela ‘nete ho leshano, bohlale ho booatla, botle ho bobe hammoho le khanya ho lefifi.” Sehapi o beha joalo lengolong.
Lengolo la balli le boetse le re thobalano lipakeng tsa batho ba bong bo ts’oanang ha e tlisi letho le molemo empa e nyelisa ‘mele ea bao e le tempele.
Adv. Fusi Sehapi
“Re ke ke ra iphapanyetsa taba ea hore naha e lokela ho sireletsa sechaba sa eona le ho bona hore se phela hantle.” Lengolo le rialo.Sehapi o thatiselletsa ka lengolo la Baroma 1: 25-32: “Leha ba ipoletse ba le bohlale, ba ile ba fetoha lithoto ka ho fetolela khalalelo ea Molimo ho sets’oants’o se hlahisang motho a halalela le linonyana, liphoofolo le lihahabi.” Ka temana ena Sehapi o hlokomelisa Kereke hore ho lumella tlhohonolofatso ea batho ba nang le likamano tsa lerato le bong bo ts’oanang e khahlanong le Molimo.
Sehapi o re tumelo ea bona e sa thekeseleng ke hore ho hlohonolofatsa batho ba nang le likamano le batho ba bong bo ts’oanang ke tsela e ‘ngoe e ba lumellang hore e ka ba nama e le ‘ngoe ka lenyalo. O boetse o teka hore ke taba e tsebahalang hore molao oa Lesotho o thibela lenyalo la batho ba bong bo le bong ‘me haeba ba ka fuoa tlhohonolofatso e tla ba thohako le phoso e kholo.
“Kaha manyalo lipakeng tsa batho ba bong bo ts’oanang a ke ke a hlohonolofatsoa ka kotloloho, kahona h’a lokela ho hlohonolofatsoa ka tsela e sa otlolohang. Ha ho nepahale hore ntho e fosahetseng e etsetsoe molao ho tsoa nthong e fosahetseng.” Sehapi o phahamisa tletlebo joalo.
O phethela ka ho ipiletsa ho Kereke e Halaleng e K’hatholike hore e se ikenye ts’otso linaleng ka ho hlohonolofatsa batho ba bong bo le bong.
Moareka-Bishopo Tlali Lerotholi o re Kereke e K’hatholike e nka lenyalo e le kopano ea monna a le mong le mosali a le mong
“Haeba boipiletso ba rona Kereke e sa bo sekehele tsebe, re tlo hloka boikhethelo ‘me re tlil’o atamela makhotla a molao ho fumana thuso.” Lengolo la Sehapi le phethela joalo.
Ho sa le joalo Leihlo la Basotho le nontse mobabatsehi Tlali Gerard Lerotholi maikutlo holima lengolo la balli. O ts’oaetse tjena: “E re ba il’o qosa, re tla ba araba ka khotla, re tla ba utloa khotla haeba ke liakhente. Ba na le matla afe a ho bolella kereke e k’hatholike hore e rute eng? Ke bo-mang bona?”
Mobishopo o boetse o makalla liakhente ka hore bona ha ba na thuto ea hore ba tlo nyalisa batho ba bong bo le bong: “Ha ke tsebe hore na ba araba eng, ha ke tsebe hore na ba balile eng, ke hokae moo Kereke e K’hatholike e chulong joalo?
“Ha ba tlohele ho etseletsa Kereke. Ha re na thuto e joalo kahara Kereke e K’hatholike (ea ho nyalisa kapa ho hlohonolofatsa manyalo a batho ba bong bo le bong.)
“Ke batla ho ba tataisa hore haeba ba ngolletse Ntlo-Kholo ea Kereke e K’hatholiki ba tsebe hore Ntlo-Kholo ke Rome koana.” O fera puo.
Ho sa le joalo Mobishopo Lerotholi pejana o ne a bue le Leihlo la Basotho a hlakisa hore phatlalatso ea Mopapa Francis e re Baprista ba tla hlohonolofatsa batho ba bong be le bong e le batho kapa libopuoa tsa Molimo ha ba kopa tlhohonolofatso. O ile a hlakisa hore Kereke e K’hatholiki e ntse e nka lenyalo e le kopano ea monna a le mong le mosali a le mong. Bala litaba tseo ka botlalo 👉🏼MONA.
