BAHOEBI BA MATEKOANE BA FUMANA KOTLO E BOIMA
Ka Moipone Makhemeng
La 11 Pherekhong 2024
Banna ba babeli Fusi Nkhane (38) oa Thabana Morena, Mafeteng le Thabo Mokone (26) oa Mokhethoaneng ha morena ’Mamolapo Majara seterekeng sa Berea ba fumanoe ba le molato oa ho ba le matekoane ka thoko ho molao ke ’maseterata Itumeleng Letsika oa lekhotla la ’maseterata, Maseru maobane.
‘Maseterata Itumeleng Letsika [Image supplied]
Mochochisi Rats’ita o supile hore lihoreng tsa mantsiboea ka la 9 Pherekhong 2024 pele ho ts’oaroa banna bao, ‘matli oa nyeoe e leng Police Constable Lebakeng o ile a bonts’a a ile a fuoa monyenyetsi oa hore ho na le mok’huk’hu pela letamo la Maqalika, Khubetsoana, oo monga oona (Nkhane) a rekisetsang bana matekoane ‘me ho bile le tlhaloso ea hore bana ba kula, ha ba bang ba hana ho kena sekolo ka lebaka la matekoane ao ba a rekang moo.
Hang-hang o ile a leba moo ‘me a fumana Nkhane a ntse a thatela ‘lisolo’. Ke moo a ileng a mo hlalosetsa se mo behang moo. O boetse a mo batla lengolo le mo lumellang ho hoeba ka matekoane eaba moqosuoa o hloleha ho le hlahisa.
Moqosuoa o ile a ts’oaroa ‘me lepolesa la hapa lisolo tse robeli tseo a neng a li fasitse a le mothating oa ho li rekisa ‘me tsona li hlahisitsoe e le liponts’uoa kapele ho lekhotla.
Ho sa le joalo, ts’oaro ea moqosuoa e mong, Mokone e tlile kamora hore ‘matli oa nyeoe a ‘mone a tsoa mok’huk’hung o boletsoeng. Ke moo a ileng a mo emisa ‘me a fumana matekoane ho eena.
Ha a ikopela mohau ho lekhotla, moqosuoa oa pele, Nkhane o itse o na le mosali leha ba arohane. A tekela lekhotla hore o na le bana ba babeli, ea lilemo li 12 le tse supileng.
Moqosuoa oa bobeli, Mokone o ile a ikopela ts’oarelo ‘me a itlama ho se phete tlolo e joalo ea molao. O bonts’itse a e-s’o nyale a bile a se na bana. O boletse hape hore ke sebini.
Lekhotla ha le ea ba le mohau ho bona ‘me bobeli ba ile ba ahloloa lilemo tse hlano chankananeng kapa ho itefella M20,000.00 motho ka mong. Baqosuoa ba theohetse toronkong kaha ba sitiloe ho itefella kotlo ea M20,000.00 motho ka mong.
